Máhállelerdegi belsendi hayallar menen jaqınnan pikirlesildi
600
Sońǵı jılları hayal-qızlarǵa degen ayrıqsha itibar hám ǵamxorlıqlar nátiyjesinde elimizde olar ushın barlıq sharayatlar, kóplegen imkaniyatlar jaratılıp berilmekte. Bul múmkinshilikler negizinde shańaraq uyıtqısı bolǵan hayallardıń búgingi turmısınan razılıǵın támiyinlew baslı maqset etip alınǵan.
Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonınıń belsendi hayalları menen ushırastı.
Onda búgingi kúnde elimizde ámelge asırılıp atırǵan sociallıq-ekonomikalıq hám jámiyetlik-siyasiy reformalarda hayal-qızlardıń tutqan ornınıń artıp baratırǵanı, olardıń turmıs abadanlıǵın támiyinlew baǵdarında bar múmkinshilikler jaratılıp atırǵanı ayrıqsha tilge alındı.
Aytıp ótiw orınlı, búgingi kúnde usınday imkaniyatlardan keńnen paydalanıp atırǵan hayal-qızlarımız kópshilikti quraydı. Bıyılǵı jıldıń yanvar-may aylarınıń ózinde 4418 hayal-qız kásip-ónerge oqıtıldı, 4814 hayal-qızǵa 43 mlrd. 331 mln sumlıq jeńilletilgen kreditler ajıratıldı, 272 hayal-qızǵa 1 mlrd. 347 mln sumlıq subsidiyalar berildi.
Bunnan tısqarı, shańaraqlıq isbilermenlikti rawajlandırıw baǵdarlaması sheńberinde 13 mıń 132 hayal-qızlardıń biznes joybarların qarjılandırıw ushın 170 mlrd. 735 mln sum muǵdarında qarjılar menen támiyinlendi. Sonday-aq, 169 hayal-qız ónermentshilikke qamtıp alındı. Eń áhmiyetlisi, qala hám rayonlardaǵı járdemge mútáj 70 hayal-qız turaq-jay menen támiyinlendi hám 268 hayal-qızdıń turaq-jayların ońlawǵa ámeliy járdemler kórsetildi.
Bunnan tısqarı, puqaralarımızdıń, sonıń ishinde hayal-qızlarımızdıń turmısında ushırasıp atırǵan, kúndelikli ómirinde qıyınshılıqlar tuwdırıp kelgen mashqalalardı sheshiw boyınsha bir qatar qarar hám pármanlar qabıl etildi. Isbilermenlikti rawajlandırıw boyınsha tariyxıy 213-sanlı Párman, máhállelerdegi mashqalalardı sheshiw boyınsha infrastrukturanı jaqsılaw baǵdarında 408-sanlı qarar, járdemge mútáj bolǵan shańaraqlardıń turaq-jayların ońlaw boyınsha 52-sanlı qarar, bunnan tısqarı jáne bir neshe nızam hújjetleri qabıl etildi. Usı tiykarda hayal-qızlarımız duslasıp atırǵan qatar máseleler óz sheshimin tawıp atır.
Ótkerilgen ushırasıwda mine usınday bir qatar jaratılǵan imkaniyatlar, sonıń menen birge, tınıshlıǵımızdıń qádirine jetiw, óz-ara awızbirshilikti, milletler aralıq tatıwlıqtı támiyinlew hár qıylı jat ideyalarǵa berilmew sıyaqlı áhmiyetli máseleler atap ótildi.
Májilis ashıq-aydın túrde jaqınnan pikirlesiw túrinde dawam etti.
Qaraqalpaqstan Respublikası Joqarǵı Keńesiniń Málimleme xızmeti