Joqarǵı Kenes Baslıǵı Shomanay rayonınıń belsendi hayalları menen ushırastı
687
Qaraqalpaqstan Respublikası Joqarǵı Keńesiniń Baslıǵı Amanbay Orınbaev orınlarda bolıp, máhállelerdegi belsendi hayallar menen ushırasıwlar ótkermekte. Gezektegi ushırasıw Shomanay rayonında bolıp ótti.
Onda elimizde hayal-qızlar ushın qolaylı sharayatlardı jaratıw baǵdarında ámelge asırılıp atırǵan ilajlar, rejelestirilgen wazıypalar haqqında sóz etildi.
Atap aytqanda, ilim-pán, isbilermenlik, medicina, awıl xojalıǵı hám basqa da bir qatar tarawlarda hayal-qızlardı qollap-quwatlaw baǵdarında kóplegen ámeliy jumıslar dawam ettirilmekte.
Bir ǵana bilimlendiriw tarawınıń ózinde 2022-jıl 7-marttaǵı PP-87-sanlı Párman tiykarında sociallıq qorǵawǵa mútáj hayal-qızlardıń bilim alıwı ushın qolaylı sharayat jaratıw maqsetinde 2022-2023-oqıw jılında magistratura basqıshında oqıp atırǵan 2 300 den aslam student hayal-qızlardıń shártnama tólemleri tólep berildi, 1 951 joqarı hám orta arnawlı oqıw orınlarında oqıp atırǵan hayal-qızlarǵa tálim shártnamaları ushın 7 jıl múddetke procentsiz kredit ajıratıldı, sociallıq qorǵawǵa mútáj shańaraq wákilleri, jetim yaki ata-anasınan ayırılǵan 150 student hayal-qızlardıń shártnama pulları tólep berildi. Bunnan tısqarı, Shańaraq hám hayal-qızlar komitetiniń usınısı tiykarında 112 hayal-qız jeńilletilgen grant hámde 5 jıllıq stajǵa iye 35 hayal-qız tólemli shártnama tiykarında joqarı oqıw orınlarına qabıl etildi.
Usı sıyaqlı, jáne bir qatar jeńillikler hayal-qızlar ushın jaratıp berilgen. Bul imkaniyatlardan nátiyjeli paydalanıp, kóplegen hayal-qız óziniń bántiligin támiyinlep, óz isbilermenligin jolǵa qoyıp, bilim hám kónlikpelerin arttırıp atır.
Sonıń menen birge,ushırasıw dawamında jámiyetimizde awızbirshilikti saqlaw, tatıwlıqtı bekkemlew, milletler aralıq doslıqtı támiyinlew máseleleri de ayrıqsha tilge alındı.
Qaraqalpaqstan Respublikası Joqarǵı Keńesiniń Málimleme xızmeti