Joqarǵı Keńes Baslıǵı Taqıyatas rayonınıń belsendi hayalları menen ushırastı
486
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taqıyatas rayonınıń belsendi hayalları menen ushırastı.
Ushırasıwda búgingi kúnde hayal-qızlardı qollap-quwatlaw baǵdarındaǵı ámelge asırılıp atırǵan jumıslar, qabıl etilgen Qarar hám Pármanlar tiykarında xalqımız, sonıń ishinde hayal-qızlarǵa jaratılǵan kóplegen imkaniyatlar, oldardıń jámiyietimizdegi rolin arttırıw boyınsha jumıslar hám basqa da bir qatar áhmiyetli máseleler haqqında sóz etildi.
Sonday-aq, ushırasıw dawamında shańaraqlardaǵı awızbirshilikti saqlaw, máhállelerde tatıwlıqtı támiyinlew, jámiyietimizde insaniylıq, mehir-múriwbet, bir-birine ǵamxorlıq kórsetiw, milletler aralıq doslıqtı saqlawda hayal-qızlardıń tutqan ornınıń ayrıqsha ekenligi atap ótildi.
Atap ótiw kerek, sonǵı jılları hayal-qızlardı qollap-quwatlaw, olardıń jámiyietimizde belsendiligin arttırıw baǵdarında bir qatar áhmiyetli wazıypalar ámelge asırılmaqta. "Hayallar dápteri", "Temir dápter", "Jaslar dápteri" tiykarında olarǵa hár tárepleme járdemler kórsetilip atır. Prezidentimiz tárepinen qabıl etilip atırǵan Qarar hám Pármanlar tiykarında hayal-qızlardıń bilim alıwı ushın sharayat jaratıw, sociallıq jaǵdayın jaqsılaw, kásip-ónerge baǵdarlaw, olardıń bántligin támiyinlew boyınsha keń kólemli jumıslar dawam ettirilmekte.
Sonıń menen birge rayonda alıp barılıp atırǵan kólemli qurılıs hám abadanlastırıw jumısları jóninde sóz etildi.
Qaraqalpaqstan Respublikası Joqarǵı Keńesiniń Málimleme xızmeti