Baspasóz hám ǵalaba xabar quralları xızmetkerleri kúni keń túrde belgilendi

Búgin Berdaq atındaǵı Qaraqalpaq mámleketlik akademiyalıq muzıkalı teatrında «27-iyun – Baspasóz hám ǵalaba xabar quralları xızmetkerleri kúni» múnásibeti menen bayram saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, búgingi bayram múnásibeti menen jıynalǵanlardı qutlıqladı. Atap ótilgenindey, sońǵı jılları elimizde húrmetli Prezidentimizdiń basshılıǵında málimleme hám sóz erkinligin támiyinlew, ǵalaba xabar quralların hár tárepleme qollap-quwatlaw, taraw pidayıların múnásip xoshametlew, xalıqqa qalıs hám isenimli málimlemelerdi jetkeriw, barlıq tarawlarda ámelge asırılıp atırǵan reformalardı xalıq arasında keńnen úgit-násiyatlaw baǵdarında keń kólemli jumıslar ámelge asırılmaqta.

Mámleketimizdiń jámiyetlik-siyasiy, sociallıq-ekonomikalıq, turmısında júz berip atırǵan ózgerisler hám jańalanıwlardı, ásirese «Insan qádiri ushın» ideyası astında islenip atırǵan jumıslardı keń jámiyetshilikke jetkeriw, xalqımızdıń turmısında ushırasıp atırǵan másele hám mashqalalardı úyreniw, olarǵa unamlı sheshim tabıw jolında taraw xızmetkerleri tárepinen alıp barılıp atırǵan dóretiwshilik miynet joqarı bahalanadı. Atap ótiw kerek, jurnalist hám blogerlerdiń pikir-usınısları tiykarında bıyılǵı jıldıń ózinde 661 mln. sumlıq qarjı esabınan Qaraqalpaqstan radiosına radio tolqınların uzatıw antennaları satıp alınbaqta. Búginniń ózinde 2 mlrd 339 mln. sumlıq qarjı esabınan Qaraqalpaqstan televideniesiniń materiallıq-texnikalıq bazasın jáne de bekkemlew ushın qosımsha imkaniyat jaratılmaqta. 757 mln. sumnan aslam qarjı ajıratılıp, “Baspasóz úyi” imaratında “Media-oray” shólkemlestirilmekte. Bunnan tısqarı, jıl basınan berli Mámleketlik uyımlarǵa respublikalıq gazeta-jurnallarǵa jazılıwdı shólkemlestiriw maqsetleri ushın 2 mlrd 119 mln.sum qarjı ajıratıldı. Taraw pidayılarınıń miynetleri menen 12-iyunnen baslap sanlı teleuzatqısh arqalı Taxtakópir, Qaraózek hám Shımbay rayonları xalqı jergilikli mámleketlik emes telekanallardı, yaǵnıy, “Ámiwdárya TV”, “Jaslar TV” hám “Ellikqala TV” telekanalların test rejiminde kóriw imkaniyatına iye bolmaqta. Sonday-aq, “Nókis FM” radio-efiri kólemin keńeytiw maqsetinde Taxtakópir radio-televizion stanciyasına 500 vatlı radiouzatqısh hám antenna qurılmaları ornatıldı. Eń áhmiyetlisi, dóretiwshi insanlar menen birgelikte bunday jumıslar ele dawam etpekte.

Dóretiwshilerdiń kásiplik bayramı múnásibeti menen baspasóz hám ǵalaba xabar quralları tarawınıń bir topar veteranlarına «Ardaqlı nuraniy», taraw xızmetkerlerine «Watan pidayısı» kókirek belgileri, ózleriniń yubiley sánelerin belgilep atırǵan gazeta-jurnallar redakciyalarına, televedenie hám radio jámáátlerine kompyuterler, bir topar taraw xızmetkerlerine hám blogerlerge Húrmet jarlıqları menen bahalı sawǵalar tapsırıldı.

  Ótkerilgen bayram saltanatı mádeniyat hám kórkem óner xızmetkerleri tárepinen tayarlanǵan koncert baǵdarlaması menen dawam etti. Ilajǵa Ózbekstan Respublikası Prezidentiniń Keńesgóyi T.Xudaybergenov, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.

Qaraqalpaqstan Respublikası Joqarǵı Keńesiniń Málimleme xızmeti