Máhállelerdegi belsendi hayallar menen jaqınnan pikirlesildi
505
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Xojeli rayonınıń belsendi hayalları menen ushırastı.
Onda búgingi kúnde elimizde ámelge asırılıp atırǵan sociallıq-ekonomikalıq hám jámiyetlik-siyasiy reformalarda hayal-qızlardıń tutqan ornınıń artıp baratırǵanı, olardıń turmıs abadanlıǵın támiyinlew baǵdarında bar múmkinshilikler jaratılıp atırǵanı ayrıqsha tilge alındı.
Atap ótiw kerek, sońǵı jılları hayal-qızlarǵa degen ayrıqsha itibar hám ǵamxorlıqlar nátiyjesinde elimizde olar ushın barlıq sharayatlar, kóplegen imkaniyatlar jaratılıp berilmekte. Bul múmkinshilikler negizinde shańaraq uyıtqısı bolǵan hayallardıń búgingi turmısınan razılıǵın támiyinlew baslı maqset etip alınǵan.
Bunnan tısqarı, puqaralarımızdıń, sonıń ishinde hayal-qızlarımızdıń turmısında ushırasıp atırǵan qıyınshılıqlardı sheshiw boyınsha bir qatar qarar hám pármanlar qabıl etildi. Isbilermenlikti rawajlandırıw boyınsha tariyxıy 213-sanlı Párman, máhállelerdegi mashqalalardı sheshiw boyınsha infrastrukturanı jaqsılaw baǵdarında 408-sanlı qarar, járdemge mútáj bolǵan shańaraqlardıń turaq-jayların ońlaw boyınsha 52-sanlı qarar, bunnan tısqarı jáne bir neshe nızam hújjetleri qabıl etildi. Usı tiykarda hayal-qızlarımız duslasıp atırǵan qatar máseleler óz sheshimin tawıp atır.
Ótkerilgen ushırasıwda mine usınday bir qatar jaratılǵan imkaniyatlar, sonıń menen birge, tınıshlıǵımızdıń qádirine jetiw, óz-ara awızbirshilikti, milletler aralıq tatıwlıqtı támiyinlew hár qıylı jat ideyalarǵa berilmew sıyaqlı áhmiyetli máseleler atap ótildi.
Qaraqalpaqstan Respublikası Joqarǵı Keńesiniń Málimleme xızmeti