Nókis rayonınıń belsendi hayalları menen jaqınnan pikir almasıldı
593
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonınıń belsendi hayalları menen ushırastı.
Aytıp ótiw orınlı, hayal-qızlardıń búgingi kúnde jámiyetimizde tutqan rolin arttırıw baǵdarında ámelge asırılıp atırǵan jumıslar tiykarında olar hár bir tarawda ózleriniń belsendiligin, miynetsúygish hám óz jumısına juwapkershilik, pidayılıq penen qaraytuǵınlıǵın kórsetip atır.
Aytıp ótiw kerek, hayal-qızlardı qollap-quwatlaw baǵdarında kóplegen ámeliy jumıslar turmısta óz sáwlesin tawıp atır.
Atap ótetuǵın bolsaq, 2022-jıl 31-avgusttaǵı Prezidentimizdiń 213-sanlı tariyxıy Pármanı qabıl etildi. Usı Párman tiykarında jaratılǵan imkaniyatlar nátiyjesinde máhállelerde miyirbiykelik qánigeligi boyınsha oqıwdı tamamlaǵan hámde házirgi waqıtta jumıssız bolǵan hayal-qızlardıń qánigeligin arttırıw arqalı olardıń bántligin támiyinlew belgilendi, jas isbilermenlerge óndiris hám xızmet kórsetiw ushın zárúr ásbap-úskeneler satıp alıw maqsetinde 7 jıl múddetke qarız qarjıları ajıratılatuǵın boldı, isbilermenler ushın salıq jeńillikleri, tek qaraqalpaqstanlı jaslar ushın Tashkent qalasındaǵı hám barlıq wálayatlardaǵı joqarı oqıw orınlarına qosımsha kvotalar ajıratılıwı sıyaqlı bir qatar jeńillikler berildi.
Jaratıp berilgen imkaniyatlardı jáne bir neshe qararlar tiykarında dawam ettirsek boladı. Eń baslısı, usı párman hám qararlar negizinde hayal-qızlar ushın kóplegen imkaniyatlar jaratıp berilmekte.
Májiliste usı sıyaqlı qatar jeńillikler atap ótilip, búgingi kúnde elimizdiń rawajlanıwı jolında biybaha baylıǵımız esaplanǵan tınıshlıǵımızdı saqlaw, awızbirshiligimizdi bekkemlew, doslıq hám tatıwlıqtı támiyinlew kerek ekenligi ayrıqsha tilge alındı.
Qaraqalpaqstan Respublikası Joqarǵı Keńesiniń Málimleme xızmeti