Beruniy rayonı máhállelerindegi belsendi hayallar menen jaqınnan pikirlesildi
525
Sońǵı jılları hayal-qızlarǵa degen ayrıqsha itibar hám ǵamxorlıqlar nátiyjesinde barlıq salalarda olardıń ornı girewli bolıp barmaqta. Bul múmkinshilikler negizinde shańaraq uyıtqısı bolǵan hayallardıń búgingi turmısınan razılıǵın támiyinlew baslı maqset etip alınǵan.
Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Beruniy rayonınıń belsendi hayalları menen ushırastı.
Onda búgingi kúnde elimizde ámelge asırılıp atırǵan sociallıq-ekonomikalıq hám jámiyetlik-siyasiy reformalarda hayal-qızlardıń tutqan ornınıń artıp baratırǵanı, olardıń turmıs abadanlıǵın támiyinlew baǵdarında bar múmkinshilikler jaratılıp atırǵanı ayrıqsha tilge alındı.
Aytıp ótiw orınlı, usınday imkaniyatlardan keńnen paydalanıp atırǵan hayal-qızlarımız kópshilikti quraydı. Bıyılǵı jıldıń yanvar-may aylarınıń ózinde 4418 hayal-qızlar kásip-ónerge oqıtıldı, 4814 hayal-qızǵa 43 mlrd. 331 mln sumlıq jeńilletilgen kreditler ajıratıldı, 272 hayal-qızǵa 1 mlrd. 347 mln sumlıq subsidiyalar berildi.
Ótkerilgen ushırasıwda mine usınday bir qatar jaratılǵan imkaniyatlar jóninde atap ótildi.
Sonıń menen birge búgingi tınıshlıǵımızdıń qádirine jetiw, óz-ara awızbirshilikti, milletler aralıq tatıwlıqtı támiyinlew, hár qıylı jat ideyalarǵa berilmew sıyaqlı áhmiyetli máseleler atap ótildi.
Qaraqalpaqstan Respublikası Joqarǵı Keńesiniń Málimleme xızmeti