Hayal-qızlarǵa jaratılǵan imkaniyatlar keń túrde atap ótildi

Búgingi kúnde elimizde hayal-qızlardı qollap-quwatlaw, olarǵa bar múmkinshiliklerdi jaratıp beriw boyınsha bir qatar ámeliy jumıslar ámelge asırılıp atırǵan bolıp, bul baǵdarda kóplegen hayal-qızlar ózlerine jaratıp berilgen sharayatlardan nátiyjeli paydalanıp atır. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraózek rayonınıń belsendi hayalları menen ushırastı. Onda elimizde hayal-qızlar ushın qolaylı sharayatlardı jaratıw baǵdarında ámelge asırılıp atırǵan ilajlar, rejelestirilgen wazıypalar haqqında sóz etildi.

  Aytıp ótiw kerek, hayal-qızlarǵa ǵamxorlıq kórsetiw hám qollap-quwatlaw baǵdarında bir qatar járdemler berilmekte. Bir ǵana bıyılǵı jıldıń ózinde 195 mıń 325 hayal-qızlar onkoliyalıq skriningten, 5 448 nuranıy analarımız tereńlestirilgen medicinalıq tekseriwden ótkerildi, bir qatar nuranıy analarımız zárúr dári-dármaq, azıq-awqat, kiyim-kenshekler menen támiyinlendi. Bunnan tısqarı, nuranıy analarımızdıń sanatoriyalarda sawallandırıldı, mayıplıǵı bar bolǵan hayal-qızlar hám jas óspirimler reabilitaciya úskeneleri menen támiyinlendi. Bulardan tısqarı, sociallıq qollap-quwatlawǵa mútáj hayal-qızlardıń, jas óspirimlerdiń operaciya hám emleniwi ushın Shańaraq hám hayal-qızlar mámleketlik maqsetli fondı tárepinen zárúr qarjılar ajıratıldı. Álbette, bulardıń barlıǵı hayal-qızlarǵa qaratılıp atırǵan ayrıqsha itibardıń ámeliy kórinisi bolıp tabıladı. Ushırasıwda usı sıyaqlı bir qatar áhmiyetli máseleler átirapında sóz bardı. Sonıń menen birge, ushırasıw dawamında jámiyetimizde awızbirshilikti saqlaw, tatıwlıqtı bekkemlew, milletler aralıq doslıqtı támiyinlew máseleleri de ayrıqsha tilge alındı.  

Qaraqalpaqstan Respublikası Joqarǵı Keńesiniń Málimleme xızmeti