Jaslar aylıǵı ózinde mıń-mıńlap jaslardı jámley aldı
732
Búgin Berdaq atındaǵı Qaraqalpaq mámleketlik akademiyalıq muzıkalı teatrında 30-iyun – Jaslar kúni múnásibeti menen «Jańa Ózbekstan jasları, birleseyik!» súreni astında koncert baǵdarlaması bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan Respublikası Prezidenti Shavkat Mirziyoevtiń elimiz jaslarına jollaǵan qutlıqlawın oqıp esittirdi hám respublikamız jasların qutlıqladı.
Joqarı dárejede ótkerilgen bayram ilajında ózleriniń talantı, uqıbı menen teńlesleri arasında jaqsı nátiyjelerge erisken, sonday-aq, elimizdiń rawajlanıwına múnásip úles qosıp atırǵan bir qatar belsendi jaslar «Úmit ushqını» kókirek belgileri, Húrmet jarlıqları hám bahalı sawǵalar menen sıylıqlandı.
Sonıń menen birge, Joqarǵı Keńes Baslıǵı búgingi kúnde jaslarǵa jaratılıp atırǵan burın bolmaǵan úlken imkaniyatlar hám itibardan hár bir jastıń nátiyjeli paydalanıp, elimizdiń gúllep-jasnawına múnásip úles qosatuǵınlıǵın ayrıqsha atap ótti.
«30-iyun – Jaslar kúni» shın mánisinde jaslardıń eń súyip kútetuǵın bayramına aylanǵan. Bıyılǵı jılda «Iyun ayı – jaslar aylıǵı» sıpatında belgilenip, sport jarısları, bayram ilajları, kewil ashar hám zawıqlı kesheler ótkerildi. Eń baslısı, jaslar aylıǵı ózinde mıń-mıńlap jaslardı jámley aldı.
Búgingi ótkerilgen bayram ilajı mádeniyat hám kórkem óner sheberleri, estradamızdıń belgili wákilleri atqarıwındaǵı koncert baǵdarlaması menen dawam etti.
Qaraqalpaqstan Respublikası Joqarǵı Keńesiniń Málimleme xızmeti