Joqarǵı Keńes Baslıǵı Moynaq rayonınıń kóshe biyleri menen ushırastı
498
Joqarǵı Keńes Baslıǵı Amanbay Orınbaev orınlarda kóshe biyleri menen ashıq-aydın pikirlesip, ámelge asırılıwı tiyis wazıypalardı belgilep alǵan edi. Búgin Joqarǵı Keńes Baslıǵı úshinshi márte kóshe biyleri hám máhálle belsendileri menen ushırasıwın Moynaq rayonınan basladı.
Atap ótiw kerek, ushırasıwlardı ótkeriwden tiykarǵı maqset – xalıqtı razı etiw jolında ámelge asırılıwı zárúr bolǵan wazıypalardı belgilep alıw, elimizde jaratılıp atırǵan imkaniyatlar hám keshiktirip bolmaytuǵın máseleler boyınsha jáne bir márte jaqınnan pikirlesip alıwdan ibarat.
Sońǵı jılları húrmetli Prezidentimizdiń tapsırması menen xalıqtıń jıllar dawamında jıynalıp qalǵan táshwishleriniń sheshimin tabıwda barlıq buwındaǵı basshılar tómenge túsip, «Xalıq mámleketlik uyımlarǵa emes, al, mámleketlik uyımlar xalqımızǵa xızmet etiwi kerek!» degen princip tiykarında ámeliy jumıslar alıp barılıp atır.
Ótkerilgen ushırasıwda Joqarǵı Keńes Baslıǵı shıǵıp sóylep, elimizde ámelge asırılıp atırǵan úlken dóretiwshilik jumıslar sonday-aq, respublikamız xalqı turmısın jaqsılaw baǵdarında kóterilgen bir qatar áhmiyetli baslamalar haqqında atap ótti.
Óz náwbetinde, kóshe biyleri hám máhálle belsendileri búgingi kúnde ámelge asırılıp atırǵan úlken dóretiwshilik jumıslarınan xalqımız minnetdar ekenligin, aldıńǵı ushırasıwlarda kóterilgen máselelerdiń basım kópshiligi arnawlı qabıl etilgen qarar hám pármanlar tiykarında óz sheshimin tawıp atırǵanlıǵın ayrıqsha tilge aldı.
Sonıń menen birge, ushırasıwda kóshe biyleri tárepinen bir qatar áhmiyetli máseleler kóterildi hám Joqarǵı Keńes Baslıǵı bul mashqalalarǵa aldaǵı waqıtta álbette, sheshim tabılıwı támiyinlenetuǵınlıǵın bildirdi.
Ushırasıwda ashıq-aydın pikirlesilip, wazıypalar belgilep alındı.
Qaraqalpaqstan Respublikası Joqarǵı Keńesiniń Málimleme xızmeti