Shımbay rayonı kóshe biyleri bir qatar áhmiyetli máselelerdi kóterdi

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev rayon xalqınıń abadan turmısın támiyinlew baǵdarında ámelge asırılıwı tiyis wazıypalardı belgilep alıw maqsetinde Shımbay rayonınıń kóshe biyleri menen ushırastı. Onda Joqarǵı Keńes Baslıǵı tárepinen Shımbay rayonın rawajlandırıw baǵdarında ámelge asırılıp atırǵan ámeliy jumıslar, kóshe biyleri tárepinen aldınǵı ushırasıwlarda kóterilgen máselelerdiń kópshiligi sheshimin tawıp atırǵanlıǵı boyınsha da atap ótildi. Sonday-aq, bul iygilikli baslamalardı ele de dawam ettiriw, xalıq arasındaǵı sheshimin kútip turǵan, eń zárúrli, birinshi dárejeli mashqalalardı sheshiw ushın olardı belgilep alıw maqsetinde kóshe biyleri menen ashıq-aydın pikirlesiwler ele de dawam ettiriletuǵınlıǵı ayrıqsha tilge alındı. Sonıń menen birge milletler aralıq tatıwlıq, awızbirshilik hám tınıshlıqtı saqlaw jóninde jaslar tárbiyasına qatań itibar qaratıw kerekligi biyler tárepinen atap ótildi. Ushırasıw juwmaǵında uzaq jıllıq jemisli miynetleri ushın bir qatar jası úlkenler "Ardaqlı nuranıy" kókirek belgisi menen sıylıqlandı.  

Qaraqalpaqstan Respublikası Joqarǵı Keńesiniń Málimleme xızmeti