Máhállelerdegi ele sheshimin kútip turǵan mashqalalar belgilep alındı

Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń kóshe biyleri menen máhállelerdegi ele de sheshimin kútip turǵan mashqalalardı belgilep alıw baǵdarındaǵı ushırasıwları dawam etpekte. Gezektegi usınday ushırasıw Xojeli rayonında bolıp ótti. Onda Joqarǵı Keńes Baslıǵı shıǵıp sóylep, rayon xalqınıń abadan turmısın támiyinlew baǵdarında ámelge asırılıwı tiyis wazıypalardı belgilep alıw zárúr ekenligi hám xalqımızǵa múnásip sharayat jaratıw baǵdarındaǵı iygilikli baslamalar boyınsha keń túrde atap ótti. Aytıp ótiw orınlı, Qaraqalpaqstan ushın ayrıqsha qabıl etilgen 213-sanlı párman, 408-sanlı, 52-sanlı qararlar boyınsha puqaralarımızǵa múnásip turmıs sharayatın jaratıw maqsetinde bir qatar salmaqlı jumıslar ámelge asırılıp atır. Sonday-aq, Qaraqalpaqstan ushın jaqında 329,7 mlrd. sum qarjı ajıratıldı. Bul qabıl etilgen párman hám qararlar, ajıratılǵan qarjılarda kóshe biyleriniń bildirgen usınısları hám kótergen mashqalalarınıń sheshimi de orın alǵan. Ushırasıwda Joqarǵı Keńes Baslıǵı tárepinen Xojeli rayonın rawajlandırıw baǵdarında ámelge asırılıp atırǵan ámeliy jumıslar boyınsha atap ótilip, bul iygilikli baslamalardı ele de dawam ettiriw, xalıq arasındaǵı sheshimin kútip turǵan, eń zárúrli, birinshi dárejeli mashqalalardı sheshiw ushın olardı belgilep alıw maqsetinde kóshe biyleri menen ashıq-aydın pikirlesildi. Bunnan soń, uzaq jıllıq miynet jolı dawamında jemisli xızmet etken bir qatar jası úlkenlerge «Ardaqlı nuranıy» kókirek belgisi tapsırıldı.  

Qaraqalpaqstan Respublikası Joqarǵı Keńesiniń Málimleme xızmeti