Nókis qalasında «Sanaat Qurılıs bank» akcionerlik kommerciyalıq bankiniń Qaraqalpaqstan Respublikası aymaqlıq bank xızmetleri ofisi jańa imaratınıń ashılıw máresimi bolıp ótti
651
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı jańa imarattıń paydalanıwǵa tapsırılıwı menen qutlıqladı.
Aytıp ótiw orınlı, zamanagóy arxitekturalıq talaplar hám standartlar tiykarında qurıp pitkerilgen bank ofisiniń jańa imaratı tek ǵana xalqımız ushın emes, bálkim sırt elli investorlar ushın da hár tárepleme qolaylı sharayatlarǵa iye.
Kópshiliktiń xabarı bar, bul bank kóp jıllardan berli elimizdiń sanaat hám qurılıs tarawların rawajlandırıwǵa salmaqlı úles qosıw menen birge finans, kredit siyasatı, mámleketlik baǵdarlamalar sheńberindegi ilajlarda, sociallıq, ekonomikalıq salalardaǵı reformalarda belsendilik kórsetip kelmekte.
Bir ǵana mısal, Húrmetli Prezidentimizdiń “2020-2023-jıllarda Qaraqalpaqstan Respublikasın kompleksli túrde ekonomikalıq jaqtan rawajlandırıw ilajları haqqında”ǵı 4889-sanlı Qararı tiykarında bank tárepinen ulıwma bahası 2,4 trln.sumlıq 185 joybardı ámelge asırıw belgilengen bolsa, sonnan búgingi kúnge deyin jámi 160 joybar iske túsirilip, 2 mıń 550 den aslam jańa jumıs orınları jaratıldı.
Ashılıw máresiminen soń miymanlar zamanagóy imarat, onda xalqımız ushın jaratılǵan sharayatlar menen jaqınnan tanıstı.
Qaraqalpaqstan Respublikası Joqarǵı Keńesiniń Málimleme xızmeti