«Parlament oyınları» sport jarıslarınıń jeńimpazları anıqlandı

Búgin Nókis qalasındaǵı 1-sanlı balalar hám jas óspirimler sport mektebinde (Manej) Ózbekstan Respublikası Oliy Majlisi Senatı Baslıǵı kubogi ushın «Parlament oyınları» sport jarıslarınıń Qaraqalpaqstan Respublikası basqıshı bolıp ótti. Ózbekstan Respublikası Oliy Majlisi Senatı Keńesiniń arnawlı qararına muwapıq, senatorlar hám xalıq deputatları jergilikli Keńesleri deputatları, Senat janındaǵı Jaslar parlamenti aǵzaları «Parlament oyınları» sport jarıslarında sporttıń mini futbol, voleybol, stol tennisi hámde badminton sıyaqlı túrleri boyınsha bellesti

Jarıstıń ashılıw saltanatında Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, qatnasıwshılarǵa áwmet tiledi hám sporttıń salamat turmıs tárizin qáliplestiriwdegi áhmiyeti haqqında ayrıqsha atap ótti. Bunnan soń mini-futbol, voleybol, stol tennisi hám badminton boyınsha bellesiwler baslandı. Joqarı dárejede kóterińki ruxta ótkerilgen jarısta Xalıq deputatları jergilikli Keńesleri deputatları hám Jaslar Parlamenti aǵzaları, Joqarǵı Keńes apparatı xızmetkerleri ózleriniń belsendiligin kórsetti.

Sport túrleri boyınsha ótkerilgen jarıslarda jeńimpazlar anıqlanıp, Xorezm wálayatı menen bolıp ótetuǵın aymaqlıq basqıshqa jollamaǵa iye boldı.

Jarıs juwmaǵında jeńimpazlar hám sıylı orın iyeleri shólkemlestiriwshiler tárepinen bahalı sawǵalar menen sıylıqlandı.

Qaraqalpaqstan Respublikası Joqarǵı Keńesiniń Málimleme xızmeti