Ózbekstan hám Qırǵızstan Prezidentleri eki tárepleme birge islesiwdiń áhmiyetli máseleleri boyınsha pikir alıstı
1032
24-iyul kúni Ózbekstan Respublikası Prezidenti Shavkat Mirziyoevtiń Qırǵız Respublikası Prezidenti Sadir Japarov penen telefon arqalı sóylesiwi bolıp ótti.
Qırǵızstan jetekshisi mámleketimiz basshısın tuwılǵan kúni menen qızǵın qutlıqlap, Ózbekstanǵa tınıshlıq-paraxatshılıq hám turaqlı rawajlanıw tiledi.
Sáwbette Ózbekstan menen Qırǵızstan arasındaǵı jaqsı qońsıshılıq hám keń kólemli strategiyalıq sheriklik qatnasıqların jáne de bekkemlewdiń áhmiyetli máseleleri kórip shıǵıldı.
Sanaat, avtomobil qurılısı, toqımashılıq hám elektrotexnika tarmaqlarında, energetika infrastrukturasın modernizaciyalaw boyınsha hám tarmaqlardıń basqa da tarawlarında qospa kooperaciya joybarların ámelge asırıwda erisilip atırǵan nátiyjeler qanaatlanıwshılıq penen atap ótildi.
Húkimetleraralıq komissiyanıń jumısı sheńberinde jańa sawda hám investiciyalıq joybarlar toplamın tayarlawǵa ayrıqsha itibar qaratıldı.
Ózbekstan hám Qırǵızstan jetekshileri bolajaq joqarı dárejedegi ilajlar rejesin de kórip shıqtı. Qaraqalpaqstan Respublikası Joqarǵı Keńesiniń Málimleme xızmeti