Dúnyadaǵı eń iri xabar saytlarınıń birinde Qaraqalpaqstannıń turistlik potencialı haqqında maqala járiyalandı

Usı jıldıń 31 may - 5 iyun kúnleri Ózbekstan Respublikası Mádeniyat hám turizm ministrliginiń baslaması menen Turizm hám mádeniy miyras ministrligi tárepinen bir qatar sırt elli ǴXQ wákilleri ushın Qaraqalpaqstan Respublikasınıń dıqqatqa ılayıqlı orınları boylap keń kólemli press-tur shólkemlestirildi. Press-turda Ullı Britaniya, Ispaniya, Finlyandiya, Indiya hám Indoneziya mámleketleriniń “The Caspian Post”, “Lonely Planet”, “Metro TV”, “The Travel Magazine”, “Indian Express”, “Alonesia” kibi blog, telekanal hám basılımlarınıń fotokorrespondent, xabarshı hámde telebaslawshıları qatnastı. Press-tur nátiyjesinde elimizdiń tariyxı, mádeniyatı, úrip-ádetleri, flora hám faunası, dıqqatqa ılayıqlı orınları hámde turistlik infrastrukturası haqqında bir qatar mámleketlerdiń ǴXQda materiallar járiyalanıp barıldı. Mine usılar qatarında, 23-iyul kúni Indiyanıń “The Indian Express” gazetasında Qaraqalpaqstannıń tiykarǵı turistlik marshrutlarınıń biri bolǵan Moynaq rayonı hám Aral teńizi haqqında maqala járiyalandı. Maqalada aymaqtın qısqasha tariyxı, ótmishtegi Aral teńiziniń apatshılıǵı hámde búgingi kúnde Moynaq rayonı eń belgili turistlik orınǵa aylanǵanı, sońǵı jıllarda bul jerde xostel hám miymanxanalar sanınıń kóbeiyp barıwı, al, tábiyat apatshılıǵı menen baylanıslı bolǵan jańa turizm jónelisiniń rawajlanıwı bolsa jergilikli turǵınlar ushın jańa úmit baǵıshlaǵanı aytıp ótilgen. Sonıń menen birge, avtor Aral teńizi tariyxı muzeyi, Kemeler qoyımshılıǵı, Aral teńiziniń búgingi kúnde saqlanıp qalǵan akvatoriyasınıń boyındaǵı “Bes Qala” qara úyler kompleksi hám ol jerdegi sharayatlar, internet tarmaǵı hám mobil baylanısı bolmaǵan civilizaciyadan júdá uzaqta bolǵan ekstremal turistlik orınlar haqqında atap ótken. Maǵlıwmat sıpatında, Indian Express gazetası inglis tilinde basıp shıǵarılatuǵın bolıp, 1931-jıldan beri óz jumısın alıp barmaqta. 300 mıńnan aslam tirajǵa yie bolǵan bul gazeta Indiyada abıroylı gazetalardıń biri bolıp esaplanadı. Al gazetanıń elektron variantı - indianexpress.com veb-saytın hár ayda 60 mln adam kóredi hám bul sayt dúnyadaǵı eń iri xabar saytlarınıń biri bolıp tabıladı.  

Qaraqalpaqstan Respublikası Joqarǵı Keńesiniń Málimleme xızmeti