Máhállelerde sport infrastrukturasın rawajlandırıw hám sport maydanshalarınan nátiyjeli paydalanıwdı shólkemlestiriw ilajları haqqında
852
Máhállelerde sport infrastrukturasın rawajlandırıw hám sport maydanshalarınan nátiyjeli paydalanıwdı shólkemlestiriw ilajları haqqında
Ózbekstan Respublikası Prezidentiniń qararı
Máhállelerde sport infrastrukturasın rawajlandırıw, sport maydanshalarınıń tazalıǵın saqlaw hám átirapın abadanlastırıw boyınsha jumıslardı sistemalı jolǵa qoyıw maqsetinde, sonday-aq, Ózbekstan Respublikası Prezidentiniń 2021-jıl 5-noyabrdegi «Júriw, juwırıw, mini-futbol, badminton, stritbol hám «Workout» sport túrlerin jáne de rawajlandırıw ilajları haqqında»ǵı PQ-5382-sanlı hám 2022-jıl 11-apreldegi «Máhállelerde jaslardı ǵalabalıq sportqa tartıwdı jańa basqıshqa alıp shıǵıw ilajları haqqında»ǵı PQ-201-sanlı qararlarına muwapıq:
Ózbekstan Respublikası Prezidentiniń 2022-jıl 11-apreldegi PQ-201-sanlı qararı menen tastıyıqlanǵan Máhállelerde jaslar arasında ǵalabalıq sporttı bunnan bılay da rawajlandırıw boyınsha ilajlar baǵdarlamısınıń 5-bántinde «Bes baslama olimpiadası» sheńberindegi jeńimpaz hám sıylı orın iyeleri bolǵan hám aymaqta sport infrastrukturası bolǵan máhálle saylandı komandaları ushın universal, stritbol hám vorkaut sport maydanshaların (keyingi orınlarda – sport maydanshaları) qurıw belgilengeni maǵlıwmat ushın qabıl etilsin.
«Bes baslama olimpiadası» sheńberinde jeńimpaz hám sıylı orın iyesi bolǵan hám aymaǵında sport infrastrukturası bolmaǵan máhálleniń saylandı komandaları ushın 5 000 sport maydanshaların 2030-jılǵa shekem shólkemlestiriwdiń ulıwma parametrleri qosımshaǵa muwapıq tastıyıqlansın.
Ekonomika hám qarjı ministrligi (Sh.Kudbiev) 2024-jıldan baslap hár jılı sport maydanshaların shólkemlestiriw ushın qosımsha talap etiletuǵın qarjılardıń Mámleketlik byudjet parametrlerinde názerde tutılıwın támiyinlesin.
a) sport maydanshaların qurıw «Bes baslama olimpiadası» sheńberindegi sport jarıslarınıń respublikalıq basqıshta jeńimpaz hám sıylı orın iyesi bolǵan hám aymaqta sport infrastrukturası bolmaǵan máhállelerde (keyingi orınlarda – sport infrastrukturası bolmaǵan máhállelerde) ámelge asırılatuǵını;
b) sport infrastrukturası bolmaǵan máhállelerde sport maydanshaların qurıw jumısların ámelge asırıw sheńberinde:
Ishki isler ministrligi janındaǵı Jazanı orınlaw departamenti – buyırtpashı;
Ishki isler ministrligi janındaǵı Jazanı orınlaw departamenti 13-sanlı Jazanı orınlaw mákemesi – jumıstı bólip alıw isleytuǵın bolıp esaplanatuǵını.
Onda, usı bántte názerde tutılǵan ilajlardı qarjılandırıwǵa baylanıslı qárejetler Jaslar siyasatı hám sport ministrliginiń qarjıları esabınan ámelge asırılatuǵını belgilensin.
Sonday tártip ornatılsın, oǵan muwapıq:
a) Jaslar siyasatı hám sport ministrligi hár jılı:
1-yanvarǵa shekem sport infrastrukturası bolmaǵan máhálleler dizimin Qaraqalpaqstan Respublikası Ministrler Keńesi, wálayatlar hám Tashkent qalası hákimliklerine sport maydanshaların qurıw maqsetinde tiyisli jer uchastkasın belgilengen tártipte ajarıtaw ushın usınadı;
1-martqa shekem sport maydanshalarınıń qurılısı zárúr bolǵan sport infrastrukturası bolmaǵan máhállelerdiń mánzilli dizimin tastıyıqlaydı hám buyırtpashıǵa jiberedi;
1-aprelge shekem sport maydanshalarınıń qurılısın qarjılandırıw boyınsha buyırtpashı menen shártnama dúzedi hám onı Ǵaznashılıq xızmeti komitetinde belgilengen tártipte dizimnen ótkeredi.
Onda, Jaslar siyasatı hám sport ministrligi tárepinen buyırtpashıǵa buyırtpa birilgen sport maydanshalarınıń bahasına teń qarjı tolıq ótkerip beriledi. Buyırtpashı tárepinen sistemadaǵı shólkemlerge islep shıǵarılatuǵın inventarlar ushın 100 procent qarjılar aldınnan tólep beriledi:
b) buyırtpashı hár jılı:
1-martqa shekem sport maydanshalarınıń úlgi joybarın Jaslar siyasatı hám sport ministrligi menen kelisedi, joybarlaw-smeta hújjetlerin islep shıǵadı jáne olardıń tiyisli ekspertizadan ótkeriliwin támiyinleydi;
1-aprelge shekem Jaslar siyasatı hám sport ministrligi tárepinen usınılǵan dizim tiykarında qarjılandırıw kólemlerin kórsetken halda mánzilli baǵdarlamanı islep shıǵadı hám ministrlik penen kelisilgen halda onı tastıyıqlaydı;
15-aprelge shekem bas jumıstı bólip alıp isleytuǵın menen jumıstı bólip alıw islew shártnamasın dúzedi hám sport maydanshaların qurıw jumısların ámelge asıradı;
Jaslar siyasatı hám sport ministrligi hám Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri menen birgelikte qurıp pitkerilgen sport maydanshalarınıń máhállelerge qurıp pitkerilgen sport maydanshaların qabıllaw boyınsha aymaqlıq qabıllaw komissiyalarına (keyingi orınlarda – aymaqlıq qabıllaw komissiyaları) belgilengen tártipte tapsırılıwın támiyinleydi;
v) Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri:
usı bánttiń «a» kishi bánti ekinshi abzacına muwapıq sport maydanshaların qurıw ushın bir ay múddette belgilengen tártipte jer uchastkalarınıń ajıratılıwın támiyinleydi;
qurılǵan sport maydanshaları tiyisli aymaqlıq qabıllaw komissiyaları tárepinen belgilengen tártipte qabıllap alınıwı hám olardan nátiyjeli paydalanılıwın qadaǵalaydı.
Ózbekstan Respublikası Prezidentiniń 2021-jıl 5-noyabrdegi «Júriw», juwırıw, mini-futbol, badminton, stritbol hám «Workout» sport túrlerin bunnan bılay da rawajlandırıw ilajları haqqında»ǵı PQ – 5282-sanlı qararı menen:
2021-2025-jıllarda aymaqlarda badminton, stritbol hám «Workout» sport túrleri ushın 1 164 sport maydanshaların qurıw parametrleriniń tastıyıqlanǵanı;
usı parametrler sheńberinde 2023-jılı jámi 255 sport maydanshalarınıń qurılısı názerde tutılǵanı;
2021-jıldan baslap Mámleketlik byudjetten usı qarar menen tastıyıqlanǵan baǵdarlama hám parametrler tolıq orınlanǵanǵa shekem hár jılı 104 milliard sumnan qarjılar ajıratılatuǵını maǵlıwmat ushın qabıl etilsin.
2023-jıl 1-avgusttan baslap Ózbekstan Respublikası Prezidentiniń 2021-jıl 5-noyabrdegi «Júriw», juwırıw, mini-futbol, badminton, stritbol hám «Workout» sport túrlerin bunnan bılay da rawajlandırıw ilajları haqqında»ǵı PQ – 5282-sanlı qararı sheńberinde:
Jaslar siyasatı hám sport ministrligi tárepinen zárúrlikke bola aymaǵında sport maydanshaları qurılatuǵın máhálleler dizimi Qaraqalpaqstan Respublikası Ministrler Keńesi, wálayatlar hám Tashkent qalası hákimliklerine usınılatuǵını;
Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri bir ay múddette dizimdegi máhállerde sport maydanshaların qurıw ushın belgilengen tártipte tiyisli jer uchastkaların ajıratıw boyınsha qararlar qabıl etetuǵını hám bul haqqında Jaslar siyasatı hám sport ministrligin xabardar etetuǵını;
buyırtpashı shólkem tárepinen tastıyıqlanǵan mánzilli baǵdarlamaǵa tiykarlanıp eki hápte múddette qurılatuǵın sport maydanshalarınıń joybarlaw-smeta hújjetleri islep shıǵılıp, belgilengen tártipte ekspertizadan ótkeriletuǵını hám qarjılandırıw ushın Jaslar siyasatı hám sport ministrligine usınılatuǵını;
sport maydanshalarınıń joybarlaw-smeta hújjetlerin islep shıǵıw hám ekspertizadan ótkeriwge baylanıslı qárejetler bas jumıstı bólip alıp islewshiniń basqa qárejetleri esabınan qaplanatuǵını;
buyırtpashı hám bas jumıstı bólip alıp islewshi arasında sport maydanshaların qurıw boyınsha dúzilgen shártnamalar Ekonomika hám qarjı ministrligi janındaǵı «Joybarlar hám import kontraktlerin kompleksli ekspertiza etiw orayı» mámleketlik unitar kárxanası tárepinen on jumıs kún ishinde kórip shıǵılatuǵını hám tiyisli sheshim beriletuǵını;
Jaslar siyasatı hám sport ministrligi qarjılandırıwı tiykarında 2023-jıl hám onnan keyingi jıllarda alıs hám shetki aymaqlarda jaylasqan máhálleler hám ulıwma orta bilim beriw mákemeleri aymaǵında qurılǵan sport maydanshaları olar jaylasqan aymaǵına qarap tiyisliligi boyınsha Mektpeke shekemgi hám mektep bilimlendiriwi ministrligi hám puqaralardıń ózin-ózi basqarıw uyımları sistemasına ótkeriletuǵını hám saqlanatuǵını. Onda, sport maydanshaları basqa mámleketlik shólkemlerge de operativ basqarıw huqıqı tiykarında beriliwi múmkin ekenligi;
sport maydanshalarınıń jaylasıw aymaǵına qaramastan (bilimlendiriw shólkemleri aymaǵında sabaqtan tısqarı waqıtlarda), barlıq puqaralar ushın paydalanıw biypul bolatuǵını hám waqtı sheklenbeytuǵını;
sport maydanshalarınan nátiyjeli hám maqsetli paydalanıwdı shólkemlestiriw máhállelerdegi jaslar jetekshileri hám profilaktika inspektorları tárepinen ámelge asırılatuǵını;
máhállelerde qurılǵan sport maydanshalarınıń tazalıǵın saqlaw, átiraptı abadanlastırıw jumısların orınlaw ushın Kámbaǵallıqtı qısqartıw hám bántlik ministrligi janındaǵı Jámiyetlik isler qorınıń qarjıları esabınan bir shtat birligi ajıratılatuǵını;
sport maydanshalarınan nátiyjeli paydalanıw, olardıń jaramlılıǵın támiyinlew hám aǵımdaǵı ońlaw balansında saqlawshı tárepinen ámelge asırılatuǵını belgilensin.
Mektepke shekemgi hám mektep bilimlendiriwi ministrligi;
máhállelerdegi ulıwma orta bilim beriw mekteplerine tiyisli aymaqlarda sport maydanshalarınıń qurılısın esapqa alsın hám tiyisli ilajlar kórsin;
ulıwma orta bilim beriw mektepleri aymaǵında qurılǵan sport maydanshalarınan oqıwshılar, sonday-aq, sabaqtan tısqarı hám oqıw procesine kesent etpeytuǵın waqıtlarda máhálle xalqınıń biypul paydalanıwı ushın barlıq zárúr sharayatlardı jaratsın.
Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri, Mektepke shekemgi hám mektep bilimlendiriwi ministrligi, Kámbaǵallıqtı qısqartıw hám bántlik ministrligi aymaqlıq qabıllaw komissiyaları tárepinen sport maydanshaları qabıl etilgen kúnnen baslap bir ay múddette usı obektler boyınsha mámleketlik kóshpes múlk obektlerine bolǵan huqıqları belgilengen tártipte mámleketlik dizimnen ótkeriliwin támiyinlep barsın.
Jaslar siyasatı hám sport ministrligi, Mektepke shekemgi hám mektep bilimlendiriwi ministrligi, Kámbaǵallıqtı qısqartıw hám bántlik ministrligi Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri menen birgelikte qurılıp atırǵan sport maydanshalarınıń átirapında «Jasıl mákan» ulıwma milliy joybarı sheńberinde taza ekologiyalıq ortalıq jaratıw maqsetinde miyweli hám sayamanlı terek nállerin otırǵızıw hám obekt átirapın kóklemzarlastırıw ilajların kórsin.
Qurılıs hám turaq jay kommunal xojalıǵı ministrligi usı qararda názerde tutılǵan sport maydanshaların qurıw boyınsha joybarlaw-smeta hújjetlerin belgilengen tártipte ekspertizadan ótkersin hám qurılıs-montajlaw jumıslarınıń sapalı orınlanıwı boyınsha mámleketlik arxitektura-qurılıs qadaǵalawın ornatsın.
Ózbekstan Milliy teleradiokompaniyası hám Ózbekstan Milliy málimleme agentligine aymaqlarda qurılǵan sport maydanshaları jáne olarda shólkemlestirilgen ǵalabalıq sport jarısların ǵalaba xabar qurallarında turaqlı sáwlelendirip barıw usınıs etilsin.
Usı qarardıń orınlanıwın nátiyjeli shólkemlestiriwge juwapker hám jeke juwapker etip jaslar siyasatı hám sport ministri A.I.Ikramov hám ishki isler ministri P.R.Bobojonov belgilensin.
Qarardıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi K.K.Kuranbaevqa júklensin.
Ózbekstan Respublikası
Prezidenti Sh.MIRZIYОEV
Tashkent qalası,
2023-jıl 28-iyul