Kegeyli rayonı hákimi tayınlandı
1315
Usı jıldıń 1-avgust kúni xalıq deputatları Kegeyli rayonlıq Keńesiniń gezeksiz jetpis besinshi sessiyası bolıp ótti.
Sessiyanıń kún tártibinde shólkemlestiriw máselesi kórip shıǵıldı.
Sessiya jumısına Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı hám shıǵıp sóyledi.
Sessiyada Kegeyli rayonı hákimi lawazımına Kamalov Aybek Kudabaevichtı tayınlaw máselesi kórip shıǵıldı.
Usınılǵan talabandı rayonlıq Keńestiń bir qatar deputatları qollap-quwatlap shıǵıp sóyledi.
Sessiyada Kamalov Aybek Kudabaevich Kegeyli rayonı hákimi lawazımına tastıyıqlandı.
Óz gezeginde A.Kamalov ózine bildirilgen isenimdi aqlawǵa, bilim hám tájiriybesin Kegeyli rayonın hár tárepleme rawajlandırıwǵa, ásirese, sociallıq qorǵawǵa mútáj xalıq qatlamların materiallıq qollap-quwatlawǵa, xalıqtı qıynap kiyatırǵan mashqalalarǵa sheshim tabıwǵa, isbilermenlikti rawajlandırıw arqalı qosımsha jumıs orınların jaratıwǵa jumsaytuǵınlıǵın bildirdi.
Usınıń menen xalıq deputatları Kegeyli rayonlıq Keńesiniń gezeksiz jetpis besinshi sessiyası óz jumısın juwmaqladı.
Maǵlıwmat ushın, Kamalov Aybek Kudabaevich usı kúnge shekem Qaraqalpaqstan Respublikası mámleketlik salıq basqarmasında, Ózbekstan Respublikası salıq komitetinde sonıń menen birge Ózbekstan Respublikası Prezidenti janındaǵı Isbilermenlik subektleriniń huqıq hám nızamlı máplerin qorǵaw boyınsha wákil apparatınıń Qaraqalpaqstan Respublikası boyınsha sektor baslıǵı lawazımlarında nátiyjeli jumıs alıp barǵan.
Qaraqalpaqstan Respublikası Joqarǵı Keńesiniń Málimleme xızmeti