Joqarǵı Keńes Baslıǵı sociallıq taraw obektlerine xızmet kórsetiwshi támiynatshı kárxanalar wákilleri menen ushırastı
865
Onda sociallıq tarawlarda awqatlanıwdı shólkemlestiriw, bilimlendiriw, emlew mákemelerindegi awqatlanıwdı autsorsing usılına ótkeriw baǵdarında ámelge asırılıp atırǵan ilajlar, sheshimin kútip turǵan mashqalalar, sonday-aq, jol qoyılıp atırǵan qáte-kemshilikler talqılandı hám támiynatshı kárxanalardıń pikir-usınısları tıńlandı.
Ayırım mektepke shekemgi bilimlendiriw shólkemlerinde sapalı azıq-awqat penen támiyinlew durıs jolǵa qoyılmay atır. Bunnan tısqarı, azıq-awqat ónimleriniń belgilengen norma tiykarında beriliwin qadaǵalaw jumısları da nátiyjeli alıp barılmay atır.
Tilekke qarsı, ótken oqıw jılı dawamında mekteplerde salamat awqatlandırıw sistemasın engiziwde bir qatar qáte-kemshiliklerge jol qoyıldı. Bunnan tısqarı, jetkerip berilgen ónimler quramın, sapasın turaqlı túrde qadaǵalap qabıllap alıwǵa juwapker komissiya tárepinen alıp barılǵan jumıslarda talap dárjesinde orınlanbadı.
Densawlıqtı saqlaw tarawındaǵı 38 emlew-profilaktika mekemeleriniń asxana xızmeti autsorsing menen shuǵıllanıwshı támiynatshılarǵa berilgen. Medicina tarawında da nawqaslardı azıq-awqat ónimleri menen támiyinlewde bir qatar kemshilikler hám mashqalalar ushıraspaqta. Sonıń menen birge, bir qatar emlew mákemelerinde sapalı azıq-awqat penen támiyinlew jumısları nátiyjeli alıp barılmay atır.
Ushırasıwda usı sıyaqlı qatar máseleler sın kóz-qarasta qarap shıǵıldı. Sonday-aq, jol qoyılıp atırǵan kemshiliklerdi saplastırıw boyınsha támiynatshı kárxanalar hám juwapkerlerdiń pikir-usınısları tıńlandı.
Óz náwbetinde, olar tárepinen bir qatar áhmiyetli máseleler kóterilip, Joqarǵı Keńes Baslıǵınıń jeke qadaǵalawına alındı.
Ushırasıw juwmaǵında aldaǵı ámelge asırılıwı tiyis wazıypalar belgilep alındı.
Qaraqalpaqstan Respublikası Joqarǵı Keńesiniń Málimleme xızmeti