Nókis rayonı hákimi tayınlandı
1107
Usı jıldıń 2-avgust kúni xalıq deputatları Nókis rayonlıq Keńesiniń gezeksiz jetpis birinshi sessiyası bolıp ótti. Sessiyanıń kún tártibinde shólkemlestiriw máselesi kórip shıǵıldı. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı hám shıǵıp sóyledi. Sessiyada rayon hákimi lawazımına Zaitov Ziyauatdin Imamatdinovichti tayınlaw máselesi kórip shıǵıldı. Usınılǵan talabandı rayonlıq Keńestiń bir qatar deputatları qollap-quwatlap, shıǵıp sóyledi. Sessiyada Zaitov Ziyauatdin Imamatdinovich Nókis rayonı hákimi lawazımına tastıyıqlandı.
Óz gezeginde Z.Zaitov ózine bildirilgen isenimdi aqlawǵa, bilim hám tájiriybesin rayondı hár tárepleme rawajlandırıwǵa, ásirese, sociallıq qorǵawǵa mútáj xalıq qatlamın materiallıq qollap-quwatlawǵa, xalıqtı qıynap kiyatırǵan mashqalalarǵa sheshim tabıwǵa, isbilermenlikti rawajlandırıw arqalı qosımsha jumıs orınların jaratıwǵa jumsaytuǵınlıǵın bildirdi. Usınıń menen xalıq deputatları Nókis rayonlıq Keńesiniń gezeksiz jetpis birinshi sessiyası óz jumısın juwmaqladı. Maǵlıwmat ushın, Zaitov Ziyauatdin Imamatdinovich usı kúnge shekem Shımbay rayonı ishki isler bólimi baslıǵı, Nókis qalası ishki isler bólimi baslıǵı, Qońırat rayonı hákimi, Qaraqalpaqstan Respublikası Ministrler Keńesi Baslıǵınıń birinshi orınbasarı, Nókis qalası ishki isler organları jumısların muwapıqlastırıw basqarması baslıǵı lawazımlarında nátiyjeli jumıs alıp barǵan.
Qaraqalpaqstan Respublikası Joqarǵı Keńesiniń Málimleme xızmeti