Senat jalpı májilisi óz jumısın basladı

Búgin – 2023-jıl 4-avgust kúni Tashkent qalasında Ózbekstan Respublikası Oliy Majlisi Senatınıń qırq úshinshi jalpı májilisi óz jumısın basladı. Onda senatorlar, húkimet aǵzaları, ministrlikler hám uyımlardıń basshıları, ǵalaba xabar qurallarınıń xızmetkerleri qatnaspaqta. Jalpı májilis Senattıń YouTube tarmaǵındaǵı beti arqalı tikkeley sáwlelendirilip barılmaqta. Senat Baslıǵı Tanzila Norboeva basqarıp atırǵan májilis videokonferencbaylanıs sistemasınan paydalanǵan halda ótkerilmekte. Onda bir qatar nızamlar hám basqa da máseleler dodalanıwı kútilmekte. «Gidrotexnika imaratlarınıń qáwipsizligi haqqında», «Sud qararlarınıń nızamlılıǵı, tiykarlanǵanlıǵı hám ádilligin tekseriw institutı jetilistiriliwi múnásibeti menen Ózbekstan Respublikasınıń Jınayat-processuallıq kodeksine ózgerisler hám qosımshalar kirgiziw haqqında», «Ózbekstan Respublikasınıń ayırım nızam hújjetlerine kripto-aktivler aylanısı tarawında licenziyalaw hám ruqsat beriw tártip-qaǵıydaları sistemasın jetilistiriwge qaratılǵan qosımshalar hám ózgerisler kirgiziw haqqında»ǵı nızamlar solardıń qatarına kiredi. Sonday-aq, «Advokatura haqqında»ǵı Ózbekstan Respublikası nızamınıń 31-statyasına ózgeris kirgiziw haqqında», «Volontyorlıq jumısı haqqında»ǵı Ózbekstan Respublikası nızamına ózgerisler hám qosımshalar kirgiziw haqqında», «Haywanat dúnyasın qorǵaw hám onnan paydalanıw haqqında»ǵı Ózbekstan Respublikası nızamınıń 43-statyasına qosımsha hám ózgerisler kirgiziw haqqında», «Veterinariya haqqında»ǵı Ózbekstan Respublikası nızamına ózgerisler kirgiziw haqqında»ǵı nızamlardı kórip shıǵıw rejelestirilmekte. Bunnan tısqarı, dáryalarlardıń ańǵarların tazalaw hám jaǵaların bekkemlew, rudalıq emes paydalı qazılmalardı qazıp alıwdıń qorshaǵan ortalıq, suw hám jol xojalıǵı obektlerine unamsız tásiri boyınsha Ministrler Kabinetine jiberilgen parlamentlik sorawdıń nátiyjeleri dodalanadı. Jalpı májilis usı jıldıń 4-5-avgust kúnleri ótkeriliwi rejelestirilgen. Jalpı májiliste kóriletuǵın barlıq máselelerdi saytımızda sáwlelendirip baramız. Bizdi baqlap barıń!