Awıl xojalıǵı tarawın qayta janlandırıw maqsetinde eń keminde 5 jıllıq strategiyanı islep shıǵıw búgingi kúnniń eń baslı talabına aylanıp barmaqta
721
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız aymaǵında awıl xojalıǵı tarawın rawajlandırıw, bul baǵdarda ushırasıp atırǵan mashqalalardı belgilep alıw hám azıq-awqat qáwipsizligin támiyinlewge tiyisli ilajlardı kóriw máseleleri boyınsha uzaq jıllıq tájiriybege iye fermer xojalıqları baslıqları, diyqanlar hám taraw boyınsha jumıs alıp barıp atırǵan ilimpazlar menen pikirlesti.
Onda tiykarınan búgingidey suw tamtarıslıǵı dáwirinde respublikamızdıń klimatına sáykes awıl xojalıǵı eginlerin egiw, eksportqa ótimli ónimlerdi jetistiriwdi keńeytiw, kútilgendey ónim alıwdıń kepilligi bolǵan tuqım jetistiriw, yaǵnıy, selekciyanı rawajlandırıw, bul baǵdarda tarawda ilimiy izlenisler alıp barıp atırǵan tájiriybeli ilimpazlar menen tıǵız birge islesiw, paydalanıwdan shıǵıp ketken egislik maydanların qayta paydalanıwǵa kirgiziw, suwdan únemli paydalanıw hám bir neshe jıllar dawamında jıynalıp qalǵan mashqalalardı sheshiw hám tarawdı qayta janlandırıw maqsetinde eń keminde 5 jıllıq strategiyanı islep shıǵıw máseleleri qarap shıǵıldı.
Atap ótiw kerek, awıl xojalıǵı tarawın modernizaciyalaw, tarawǵa jańa innovaciyalıq ideyalardı engiziw hám egislik maydanlarınan aqılǵa uǵras paydalanıwdıń áhmiyeti kúnnen-kúnge artıp barmaqta. Sonlıqtanda, bul baǵdarda tarawǵa anıq belgilengen strategiyanı islep shıǵıw oǵada zárúr wazıypalardan esaplanadı.
Xalıqtıń azıq-awqat káwipsizligin hám ishki tutınıwdı sapalı awıl xojalıǵı ónimleri menen támiyinlew baǵdarında orınlarda haqıyqıy alıp barılıp atırǵan jumıslar talap dárejesinde emes.
Awıl xojalıǵı eginleriniń durıs jaylastırılmawı hám rejedegi eginlerdiń tolıq egilmewi nátiyjesinde tarawda bir qansha mashqalalar júzege kelmekte.
Búgingi ótkerilgen ushırasıw mine usı sıyaqlı sheshimin kútip turǵan oǵada áhmiyetli máseleler hám bul baǵdarda ámelge asırılıwı zárúr bolǵan wazıypalar boyınsha boldı.
Qaraqalpaqstan Respublikası Joqarǵı Keńesiniń Málimleme xızmeti