Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qazaqstan Respublikasınıń ayrıqsha hám tolıq huqıqlı elshisi Beybut Atamkulov penen ushırastı
813
Ushırasıwda Ózbekstan Respublikası hám Qazaqstan Respublikası, sonıń ishinde Qaraqalpaqstan menen óz-ara baylanıslar, sawda-ekonomikalıq, sociallıq, mádeniyat, turizm boyınsha birge islesiwdi keńeytiw baǵdarında ámelge asırılıp atırǵan jumıslar, bul baǵdarda aldaǵı ámelge asırılıwı tiyis wazıypalar hám ásirler dawamında dawam etip kiyatırǵan qatnasıqlardı ele de bekkemlew máseleleri sóz etildi.
Onda sonday-aq, búgingi kúnde sawda-ekonomikalıq baylanıslardı bekkemlew boyınsha óz ara birge islesiwdi kúsheytiw, islep shıǵarılıp atırǵan ónimlerdıń eksport kólemin arttırıw, bar bolǵan infrastruktura imkaniyatlarınan nátiyjeli paydalanıw boyınsha pikirlesildi.
Aytıp ótiw kerek, búgingi kúnde Qazaqstan Respublikası menen ekonomikalıq baylanıslardı ele de keńeytiw baǵdarında bir qatar jumıslar ámelge asırılmaqta. Aymaqlıq jaqtan respublikamız benen shegaralas jaylasqanlıǵı, ónimlerdi eksport etiwde temir jol, avtomobil jolı hám hawa jolı arqalı tuwrıdan-tuwrı birge islesiw imkaniyatınıń bar ekenligi, óz-ara mádeniy baylanıslardıń jaqsı rawajlanǵanlıǵı bul baǵdardaǵı jumıslardı ámelge asırıwǵa keń imkaniyat beredi. Usı tiykarda birge islesiwler de rawajlanıp barmaqta.
Búgingi ótkerilgen ushırasıwda usı sıyaqlı áhmiyetli máseleler átirapında sóylesildi hám Qazaqstan Respublikasınıń ayrıqsha hám tolıq huqıqlı elshisi Beybut Atamkulov jıllı júzlilik penen kútip alǵanlıǵı ushın óz minnetdarshılıǵın bildirdi.
Joqarǵı Keńes Baslıǵı óz-ara birge islesiwdi qollap-quwatlaw boyınsha respublika basshıları barqulla tayar ekenligi, eksporttı keńeytiw hám sawda baylanısların bekkemlew boyınsha barlıq zárúrli ilajlar kóriletuǵınlıǵın atap ótti.
Qaraqalpaqstan Respublikası Joqarǵı Keńesiniń Málimleme xızmeti