Joqarǵı Keńes Baslıǵı respublikamızdı rawajlandırıw baǵdarında wazıypalardı belgilep alıw maqsetinde bir qatar isbilermenler menen ushırastı
767
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız aymaǵındaǵı isbilermenler menen pikirlesiw, olardıń jumısında ushırasıp atırǵan mashqalalardı anıqlaw boyınsha ushırasıw ótkerdi.
Onda húrmetli Prezidentimizdiń 2022-jıl 31-avgusttaǵı 213-sanlı Pármanı tiykarında Qaraqalpaqstandaǵı isbilermenlik subektleri ushın salıq júklerin kemeytiw, islep shıǵarıw hám xızmet kórsetiw tarawındaǵı jańa joybarlarǵa uzaq múddetli jeńilletilgen kreditler ajıratıw, isbilermenlikti qollap-quwatlaw fondı esabınan kepillikler beriw, eksporter kárxanalardıń transport qarejetleriniń bir bólegin qaplap beriw boyınsha bir qatar jeńillikler berilgenligi atap ótildi.
Bunnan tısqarı, Qaraqalpaqstan Respublikasın rawajlandırıw hám isbilermenlikti qollap-quwatlaw boyınsha Prezidentimizdiń jáne bir tariyxıy PP-129-sanlı pármanı qabıl etilgenligi, usı tiykarda respublikamız isbilermenleri ushın oǵada úlken múmkinshilikler jaratılǵanlıǵı ayrıqsha tilge alındı.
Qabıl etilgen párman menen Tikleniw hám rawajlanıw fondı tárepinen 100 mln. AQSh dolları ajıratıladı. Kommerciyalıq bankler tárepinen investiciya joybaların qarjılandırıw ushın sırt el valyutasında 5 procent, milliy valyutada 12 procent bolǵan jıllıq stavkalarda 10 jıl múddetke shekem 5 jıllıq jeńillikli dáwir menen Oraylıq banktiń tiykarǵı stavkasınan joqarı bolmaǵan muǵdarda kreditler ajıratıladı. Bunda kommerciyalıq banktiń marjası sırt el valyutadaǵı kreditler boyınsha 1 procent, milliy valyutadaǵı kreditler boyınsha 2 procent muǵdarında belgilenedi.
Xalıqaralıq qarjı institutlarınan qosımsha 200 million AQSh dollar muǵdarında kredit qarjıları tartıladı. Milliy hám sırt el valyutasında ajıratılatuǵın kredit muǵdarınıń 75 procentine shekem, biraq, 5 mlrd. sumnan aspaǵan muǵdarda kepillik beriledi. Kishi hámde jaslar sanaat hám isbilermenlik zonalarında investiciya minnetlemelerin orınlaǵan isbilermenlerge jer uchastkaların, imarat hám obektlerdi menshiklestirip beriw tártibi belgilenedi.
Aymaqta ǵalabalıq sawdalarda turǵan mámleketlik múlk obektleri 3 ay múddette satılmaǵanda olardı elektron tańlaw tiykarında eń jaqsı usınıs bildirgen talabanǵa investiciya kirgiziw minnetlemesi menen beriw tártibi engiziledi.
2023-2024-jıllarda Nókis qalasında 1 mln AQSh dolları, qalǵan rayonlarda 300 mıń AQSh dolları muǵdarında investiciya kirgiziw minnetlemesi menen joybar baslamashılarına jer uchastkaların tuwrıdan-tuwrı uzaq múddetli ijara huqıqı menen beriw sisteması engiziledi.
Ótkerilgen ushırasıwda mine usınday qaraqalpaqstanlı isbilermenler ushın jaratılǵan oǵada áhmiyetli sharayatlar haqqında keń túrde túsinik berildi.
Atap ótiw kerek, búgingi kúnde elimizdiń ekonomikasın bekkemlew hám rawajlandırıw, jańa jumıs orınların jaratıwda isbilermenlerdiń tutqan ornı ayrıqsha. Olardı qollap-quwatlaw baǵdarında bir qatar múmkinshilikler jaratılıp, imkaniyatlar berilip atırǵan bir waqıtta ayırım mashqalalar da ushıraspaqta.
Joqarǵı Keńes Baslıǵı jaqınnan sáwbette isbilermenlerdi qıynap kiyatırǵan mashqalalardı tıńladı hám hár bir isbilermen qollap-quwatlanatuǵınlıǵı, olardıń óz jumısın jolǵa qoyıwında tosqınlıq etetuǵın hár qanday basshıǵa tiyisli jaza sharası qollanılatuǵınlıǵın, isbilermenlerdiń jumısın jetilistiriw boyınsha barlıq ilajlar kóriletuǵınlıǵın atap ótti.
Óz náwbetinde isbilermenler tárepinen bir qatar áhmiyetli máseleler kóterildi hám hár bir mashqala Joqarǵı Keńes Baslıǵınıń jeke qadaǵalawına alındı.
Ushırasıw sońında wazıypalar belgilep alındı hám eksport kólemin keńeytiw ilajların kóriw boyınsha tapsırmalar berildi.
Qaraqalpaqstan Respublikası Joqarǵı Keńesiniń Málimleme xızmeti