«Qurılıs tarawı xızmetkerleri kúni» múnásibeti menen bayram saltanatı bolıp ótti
565
Búgin Berdaq atındaǵı Qaraqalpaq mámleketlik akademiyalıq muzıkalı teatrında «Qurılıs tarawı xızmetkerleri kúni» múnásibeti menen bayram saltanatı bolıp ótti.
Onda Qaraqalpaqstan Respublikası Ministrler Keńesiniń Baslıǵı F.Ermanov shıǵıp sóylep, respublikamızdaǵı qurılıs tarawında jumıs alıp barıp atırǵan barlıq xızmetkerlerdi Qaraqalpaqstan Respublikası Joqarǵı Keńesi hám Ministrler Keńesi atınan búgingi bayram múnásibeti menen qutlıqladı.
Hámmemizge belgili, mámleketimizdiń rawajlanıwın, xalqımızdıń abadan turmısın támiyinlewde búgingi kúnniń sheber qurılısshıları, injener-mexanikler, mashina-mexanizmlerdi basqarıp atırǵan pidayı insanlar, joybarlawshı-dizaynerler, qurılıs sanaatı wákilleri hám kesip alıp islewshilerdiń tutqan ornı ayrıqsha.
Olardıń tımsalında qala hám awıllarımızda, pútkil elimizde jańa islep shıǵarıw kárxanaları, áhmiyetli sociallıq obektler, zamanagóy úy-jaylar, jol hám kópirlerdi qurıp, turmısımızdı ele de abat etiwge úlken úles qosıp atırǵan keńpeyil kásip iyelerin kóremiz.
Elimizde ámelge asırılıp atırǵan úlken qurılıs hám dóretiwshilik jumısları, qala hám awıllardı abat etiw boyınsha iygilikli islerde miynetkesh taraw pidayılarınıń miynetleri salmaqlı hám ayrıqsha itibarǵa ılayıq.
Búgingi ótkerilgen bayram saltanatında da mine usınday ámelge asırılıp atırǵan iygilikli jumıslar keń túrde atap ótildi.
Ilaj dawamında Qaraqalpaqstan Respublikası Joqarǵı Keńesiniń Prezidium qararı menenen sıylıqlanǵanlarǵa kókirek belgisi hám húrmet jarlıqlardı Ministrler Keńesiniń Baslıǵı tapsırdı.
Bayram ilajı kórkem óner sheberleri atqarıwındaǵı koncert baǵdarlaması menen dawam etti.
Qaraqalpaqstan Respublikası Joqarǵı Keńesiniń Málimleme xızmeti