Joqarǵı Keńes Baslıǵı jetekshi fermer xojalıqları basshıları menen ushırastı
543
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız rayonlarındaǵı miynet aldıńǵıları bolǵan jetekshi fermer xojalıqları baslıqları menen ushırastı.
Onda tiykarınan awıl xojalıǵı tarawın modernizaciyalaw hám qayta janlandırıw maqsetinde islep shıǵılıwı rejelestirilip atırǵan strategiya boyınsha taraw wákilleriniń pikir-usınısları tıńlandı.
Sonıń menen birgelikte, búgingidey suw tamtarıslıǵı dáwirinde respublikamızdıń klimatına sáykes awıl xojalıǵı eginlerin egiw, eksportqa ótimli ónimlerdi jetistiriwdi keńeytiw, tájiriybeli ilimpazlar menen tıǵız birge islesiw máseleleri qarap shıǵıldı.
Búgingi kúnde xalqımızdıń azıq-awqat qáwipsizligin hám ishki tutınıwdı sapalı awıl xojalıǵı ónimleri menen támiyinlewdiń áhmiyeti artıp barmaqta. Bul baǵdarda suwdan aqılǵa uǵras paydalanıwdıń ornı ayrıqsha bolıp, usı tiykardaǵı jumıslardıń nátiyjeli shólkemlestiriliwi hám suwdıń ádil bólistiriliwine itibar qaratılıwı sebepli bıyıl uzaq jıllardan beri birinshi márte Qaraqalpaqstanda jetistirilgen kartoshka ónimi bazarlarımızǵa keń túrde jetkerip berilip atır.
Aytıp ótiw kerek, azıq-awqat qáwipsizligin támiyinlew baǵdarında ele de ámelge asırılıwı tiyis wazıypalar kóp. Basqa da birinshi dárejeli paydalanılatuǵın ónimlerdi jetistiriw búgingi kúnniń talabı esaplanadı. Usı maqsetti ámelge asırıwda rejelestirilip atırǵan strategiya boyınsha fermer xojalıqları basshıları ózleriniń bir qatar pikir-usınısların bildirdi.
Qaraqalpaqstan Respublikası Joqarǵı Keńesiniń Málimleme xızmeti