«Qaraózek» awıl puqaralar jıyını abat mánzillerdiń birine aylanbaqta
1691
Qaraózek rayonında búgin «Qaraózek» awıl puqaralar jıyını aymaǵın keń kólemli abadanlastırıw, aymaqta qurılıs-ońlaw jumısların alıp barıw, máhálledegi barlıq kóshelerdi tártipke keltiriw hám úlgili awıl ólshemi tiykarında kólemli dóretiwshilik jumısların alıp barıw boyınsha ushırasıw ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, hár bir basshı ózleriniń tarawı boyınsha aymaqtı abadanlastırıw jumıslarına úles qosıwı kerek ekenligi, eń baslısı, usınday awır sharayattaǵı, shetki awıllar puqaralarınıń turmısın abat etiwdey iygilikli jumıslar ele de keń kólemli túrde dawam ettiriletuǵınlıǵın atap ótti.
Ushırasıwda Ózbekstan Respublikası Prezidentiniń Keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov, Respublika prokurorı E.Tadjiev, Ishki isler ministri B.Torebekov hám basqa da bir qatar juwapkerler qatnastı.
Atap ótiw orınlı, húrmetli Prezidentimizdiń tapsırması menen xalqımızǵa múnásip sharayat jaratıw, olardıń abadan turmısın támiyinlew baǵdarında Taxtakópir rayonınıń alıs Beltaw awılı, Tórtkúl rayonınıń Qumbasqan awılı sıyaqlı eń shetki, alıs aymaqlardan baslap, Nókis qalasınıń «Jańa bazar», «Shımbay gúzarı», «Altın jaǵıs» sıyaqlı máhállelerinde de keń kólemli dóretiwshilik jumısları alıp barıldı. Usı jumıslardıń dawamı sıpatında búgin Qaraózek rayonındaǵı «Qaraózek» APJ aymaǵında jumıslar baslap jiberilgen.
Qaraqalpaqstan Respublikası Joqarǵı Keńesiniń Málimleme xızmeti