Jerdi baqsań, jer seni baǵadı

Joqarǵı Keńes Baslıǵı Amanbay Orınbaev Qaraózek rayonı «Qaraózek» awıl puqaralar jıyını aymaǵındaǵı qıytaq jerden nátiyjeli paydalanıp atırǵan Aqulov Quwandıqtıń shańaraǵında boldı. Respublikanıń bir qatar juwapkerleri hám taraw basshıları, sonday-aq, deputatlar da shańaraqta ámelge asırılıp atırǵan jumıslar menen jaqınnan tanıstı.

  Quwandıq Aqulov suw tamtarıslıǵı dáwirinde bir neshe jıldan berli úy aldındaǵı 20 sotix qıytaq jerinen nátiyjeli paydalanıp, shańaraǵı dáramatına úles qosıp kelmekte. Jer maydanında miywe-palız, baw-baqsha ónimlerin egip, baǵ dóretken hám ónim alıp kelmekte. Artqanı awıl turǵınlarına hám bazarǵa alıp shıǵılıp, dáramatına dáramat qosılıp atır. Quwandıq Aqulov suw tamtarıs waqıtları artezian qudıq arqalı atızların suwǵarıp kelgen. Bunnan tısqarı, suw turaqlı jetkerip beriliwin támiyinlew maqsetinde artezian qudıq qazıp berilmekte. Bıyılǵı jılda respublikamızda suwdıń ádil bólistirilip, qadaǵalawǵa alınıwı menen eń shetki, alıs aymaqlarǵa shekem aǵın suw jetip bardı. Nátiyjede, «Qaraózek» awıl puqaralar jıyını da suw menen támiyinlendi.

  ǵın suwdıń keliwi Quwandıqqa ǵayrat baǵıshladı desek aljaspaǵan bolamız. Mámleketimizde qıytaq jerden utımlı paydalanıwdı shólkemlestiriw boyınsha bir qansha jumıslar ámelge asırılmaqta. Sol qatarı bıyıl Quwandıqqa jáne qosımsha 15 sotix egislik jer ashıp berilip, suw saqlaǵısh ta qazıp berildi. Búginliginde usı atızlardıń barlıǵında ónim tegis pisip jetilisip atır. Qosımshasına qıytaq jeriniń bir múyeshinde qoyanshılıq ta shólkemlestirilgen. Qullası, «Jerdi baqsań, jer seni baǵadı» degen naqılda aytılǵanınday, qıytaq jer iyesi hár bir qarıs jerden nátiyjeli paydalanıp atır. Sonıń menen birge qaxarmanımız qıstada qarap otırmay ıssıxanasında nál jetistiriw menende shuǵıllanadı. Íssıxanada jetistirgen nállerin erte báhárde bazarǵa alıp shıǵadı, onnan qalaberdi qıytaq jerine de ózi jetistirgen nállerden egedi. Jer menen tillesken Quwandıq qıytaq jerine ekinshi egindi egip onnanda ónim alıp baslaǵanın maqtanısh etedi. Joqarǵı Keńes Baslıǵı Q.Aqulovtıń baǵında bolıp, jerden ónimli paydalanıwda onıń tájiriybesinen hár qanday shańaraq úlgi alıwı kerekligin atap ótti.  

Qaraqalpaqstan Respublikası Joqarǵı Keńesiniń Málimleme xızmeti