Qaraózek rayonında ǵálle egiw boyınsha kórgizbeli seminar ótkerildi

Házirgi waqıtta respublikamızdıń barlıq orınlarında kelesi jıldıń ónimi ushın ǵálle egisi jumısları baslap jiberilgen. Búgin Qaraózek rayonı «Berdaq» awıl puqaralar jıyınındaǵı «Amirbay ata» fermer xojalıǵı egislik maydanında ǵálle egiw boyınsha kórgizbeli seminar bolıp ótti.

  Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, bıyılǵı ǵálleni sapalı hám óz waqtında egiw, máwsimdi shólkemleskenlik penen ótkeriw, sonıń menen birge, egis mapazındaǵı barlıq zárúrli agrotexnikalıq is-ilajlardı ámelge asırıw kerekligin atap ótti. Seminarda Ózbekstan Respublikası awıl hám suw xojalıǵı ministrliklerinen tiyisli juwapkerler qatnastı. Jerdi egiwge tayarlaw, aymaqtıń topıraq-klimat sharayatınan kelip shıǵıp sort tańlaw, sapalı tuqımlıq egiw múddeti hám normalarına ámel etiw, egilgen daqıldıń tegis ónip shıǵıwına sharayat jaratıw ǵálleden kútilgenindey joqarı hám sapalı ónim alıwdıń tiykarǵı faktorlarınan esaplanadı.

  Ótkerilgen seminarda búgingidey suw tamtarıslıǵı baqlanıp atırǵan dáwirde suwdan nátiyjeli paydalanıw, awıl xojalıǵı maydanlarına talap dárejesinde islew beriw, egin egiletuǵın maydanlardı tayarlaw hám biyday tuqımların keshiktirmey egiw kerek ekenligi taraw wákilleri tárepinen ayrıqsha tilge alındı. Bunnan soń, Joqarǵı Keńes Baslıǵı basshılıǵında jaqsı niyetler menen kelesi jıldıń ónimi ushın tuqım sebildi.  

Qaraqalpaqstan Respublikası Joqarǵı Keńesiniń Málimleme xızmeti