Shımbay rayonında ǵálle egiw boyınsha kórgizbeli seminar bolıp ótti
918
Shımbay rayonındaǵı «Bazarbay Saparov» fermer xojalıǵında keyingi jıldıń ónimi ushın ǵálle egiw boyınsha seminar ótkerildi.
Onda Joqarǵı Keńesiniń Baslıǵı Amanbay Orınbaev qatnasıp, keyingi jıldıń zúrááti ushın ǵálleni sapalı hám óz waqtında egiw, zárúr bolǵan agrotexnikalıq ilajlardı ámelge asırıw áhmiyetli ekenligin, sonıń menen birge bul jumıslardı orınlawda hár bir fermer hám taraw wákilleri ayrıqsha juwapkershilik penen qaraw kerekligin atap ótti.
Seminarda sonday-aq, máwsimdi joqarı dárejede shólkemleskenlik penen ótkeriw, bunda ilimiy jaqtan tiykarlanǵan usıllardan paydalanıw, jerdiń ónimdarlıǵı hám basqa da qásiyetinen kelip shıǵıp, klimatımızǵa sáykes tuqım tańlaw hám nállerdiń tegis kógerip shıǵıwına erisiw, barlıq zárúrli agrotexnik ilajlardı óz waqtında hám sapalı alıp barıw, suw tamtarıslıǵı dáwirinde suwdan nátiyjeli paydalanıw, ǵálle maydanlarında jamǵırlatıp suwǵarıw texnologiyaların keńnen engiziw máseleleri sóz etildi.
Aytıp ótiw kerek, 2024-jıl zúrááti ushın Shımbay rayonınıń ǵállekeshleri ózleriniń salmaqlı úlesin qosıwdı maqset etken bolıp, 172 fermer xojalıqlarınıń 4250 gektar egislik maydanlarına biyday egiw rejelestirilgen.
Bunnan soń, Joqarǵı Keńes Baslıǵı rayon ǵállekeshleri hám nuranıylar menen birge jaqsı niyetler menen kelesi jıldıń zúrááti ushın tuqım septi.
Qaraqalpaqstan Respublikası Joqarǵı Keńesiniń Málimleme xızmeti