Joqarǵı Keńes Baslıǵı bir qatar qurılısshılar hám isbilermenler menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev bir qatar baǵdarlarda kesip alıp islewshiler, támiynatshı kárxanalar hám isbilermenler menen ushırastı. Onda dáslep, húrmetli Prezidentimizdiń 2023-jıl 10-apreldegi qararına tiykar sociallıq taraw obektleriniń ısıtıw sistemaların mámleketlik-jeke sheriklik tiykarında modernizaciyalaw hám kómirge ótkeriw máseleleri qarap shıǵıldı. Bul baǵdarda ayırım kemshilikler sınǵa alındı.

  Belgilengen wazıypalardı nátiyjeli alıp barıw boyınsha búgingi kúnde kómir qorları jaratılıp, tiyisli orınlarda rezervler jaylastırılǵan. Búgingi kúnde sociallıq taraw obektlerine jergilikli kómirdi jetkerip beriw boyınsha shártnamalar dúzilip, jetkerip berilgen. Bunnan basqa, jeke sheriklikler ushın talap etiletuǵın kómirlerdi alıp keliw rejelestirilgen. Ushırasıw dawamında kóp kvartiralı úylerde hám átiraplarında alıp barılıwı kerek qurılıs jumısları haqqında atap ótildi. Aytıp ótiwimiz kerek, Prezidenimizdiń 2021-jıl 19-iyundaǵı PQ-5152-sanlı qararı tiykarında bıyılǵı jılda jámi 57 obektte qurılıs-ońlaw jumısların ámelge asırıw ushın jámi 45,7 mlrd. sumlıq qarjı ajırıtılǵan.

  Bul ajıratılǵan qarjılar esabınan 44 obektte 421 kóp kvartiralı turaq-jaylardı kapital hám jeńil ońlaw, 13 obektte 114 kóp kvartiralı turaq-jaylardıń aymaqların abadanlastırıw jumısların alıp barıw belgilengen. Joqarǵı Keńes Baslıǵı qurılıs kárxanalarına kóshe biyleri hám máhálle belsendileriniń tikkeley baslaması tiykarında ajıratılǵan qarjını nátiyjeli hám óz ornında jumsaw, olardıń turaqlı qadaǵalawında alıp barılatuǵın jumıslar, álbette, xalqımız kútkendey ámelge asırılıwı kerek ekenligin ayrıqsha atap ótti.

  Ushırasıw dawamında bir qatar qurılısshılar hám kárxana basshıları ózleriniń pikir-usınısların bildirdi hám wazıypalar belgilep alındı.  

Qaraqalpaqstan Respublikası Joqarǵı Keńesiniń Málimleme xızmeti