«20-avgust – Isbilermenler kúni» múnásibeti menen bayram saltanatı ótkerildi

Búgin Berdaq atındaǵı Qaraqalpaq mámleketlik akademiyalıq muzıkalı teatrında «20-avgust – Isbilermenler kúni» múnásibeti menen bayram saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimiz tárepinen búgingi kúnde oǵada áhmiyetli bolǵan, isbilermenlik jumısın keńeytiw hám jańa joybarlardı ámelge asırıw ushın qolaylı sharayatlar jaratıw, isbilermenlikti rawajlandırıwǵa tosqınlıq etip atırǵan mashqalalardı saplastırıw boyınsha turmısqa engizilip atırǵan baslamalar, qabıl etilip atırǵan párman hám qararlar haqqında keń túrde atap ótti. Jaqında ǵana, 8-avgust kúni “Qaraqalpaqstan Respublikasında isbilermenlerge qolaylı sharayatlar jaratıwǵa tiyisli qosımsha ilajlar haqqında”ǵı 129-sanlı jáne bir tariyxıy Prezident Pármanı qabıl etildi. Bunnan tısqarı, mámleketimiz basshısınıń 2022-jıl 31-avgusttaǵı 213-sanlı tariyxıy Pármanı menen bir qatar jeńillikler hám múmkinshilikler jaratıldı.

  Ótkerilgen bayram saltanatında mine usınday isbilermenler ushın jaratılǵan keń imkaniyatlar, kórsetilip atırǵan ǵamqorlıqlar, berilgen jeńillikler hám usı tiykarda elimizde biznes ortalıǵı jaqsılanıp, isbilermenler sanı kóbeyip atırǵanlıǵı keń túrde atap ótildi. Bayram ilajında húrmetli Prezidentimizdiń arnawlı Pármanları tiykarında sıylıqlanǵan Moynaq rayonındaǵı «Moynaq Tur» jámiyetiniń direktorı Amina Bekjanovaǵa «Dwstlik» ordeni, Nókis rayonındaǵı «Nukus Agro Fish Klaster» kárxanasınıń baslıǵı Qallibek Primbetovqa «Shuhrat» medalı, sonday-aq, 6 belsendi isbilermenlerimizge “Faol tadbirkor” kókirek belgisi saltanatlı túrde tapsırıldı. Bunnan tısqarı, Joqarǵı Keńes Prezidiumı qararı menen bir qatar isbilermenler Joqarǵı Keńestiń kókirek belgileri, Húrmet jarlıqları hám bahalı sawǵalar menen sıylıqlandı.

Bayram ilajı kórkem óner sheberleri atqarıwındaǵı koncert baǵdarlaması menen dawam etti.    

Qaraqalpaqstan Respublikası Joqarǵı Keńesiniń Málimleme xızmeti