Búgin Nókis qalasında jaylasqan payızlı orınlardıń birinde úsh áwlad wákilleriniń diydarlasıwı bolıp ótti

Ótkerilgen ushırasıwda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizdiń rawajlanıwına múnásip úlesin qosıp kiyatırǵan bir topar veteranlar hám taraw wákilleriniń úlgili islerin ayrıqsha tilge aldı. Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov, Qaraqalpaqstan Respublikası «Nuranıy» qorı baslıǵı T.Abdijabbarov qatnastı.

Ushırasıwda respublikamızdıń barlıq rayon hám qalalarınan kelgen uzaq jıllar dawamında xalıq xojalıǵınıń túrli tarawlarında jemisli miynet etken kekseler, veteranlar, sonday-aq, student jaslar qatnastı. Jası úlken áwlad wákilleri jaslar menen pikir alısıp, jaslıq kúsh-ǵayratın qayta sezingendey boldı desek aljaspaǵan bolamız. Nuranıylardıń úgit-násiyatları jaslardı jaqsı insan bolıp jetilisiwine, hár dayım jaqsılıq islewge, tereń bilim alıwǵa, elimiz rawajlanıwına múnásip úles qosıwǵa baǵdarlaydı.

Ushırasıw dawamında elimiz rawajlanıwına salmaqlı úles qosqan bir qatar veteranlarǵa Joqarǵı Keńestiń kókirek belgileri hám bahalı sawǵaları, sonday-aq, Ózbekstan Respublikası «Nuranıy» qorınıń kókirek belgileri saltanatlı túrde tapsırıldı.

  Diydarlasıw ushırasıwı kórkem óner sheberleri atqarıwındaǵı koncert baǵdarlaması menen dawam etti. Álbette, bunday ilajlar jaslardıń hár tárepleme jetik insan bolıp jetilisiwine, miynet nuranıylarınıń turmıs mektebi menen jaqınnan tanıs bolıwına xızmet etedi.  

Qaraqalpaqstan Respublikası Joqarǵı Keńesiniń Málimleme xızmeti