Xalqımızdı sapalı azıq-awqat ónimleri menen támiyinlew tiykarǵı másele
1263
Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalıqtıń tiykarǵı azıq-awqat ónimlerine bolǵan talabın qanaatlandırıw máseleleri boyınsha juwapkerler menen ushırastı.
Onda azıq-awqat hámde awıl xojalıǵı ónimleri bahalarınıń turaqlılıǵın, sonday-aq, bazarlardı kerekli ónimler menen sistemalı hám kepillikli támiyinlew máseleleri qarap shıǵıldı.
Aytıp ótiw orınlı, azıq-awqat qáwipsizligin támiyinlew baǵdarında ónimlerdi saqlaw kárxanasına tiyisli qarjılar ajıratıp berilgen.
Usı jıldıń gúz-qıs máwsimi ushın jámi 50 mıń tonna tiykarǵı túrdegi awıl xojalıǵı ónimleri rezervin tayarlaw rejelestirilgen bolıp, talap etiletuǵın qarjılardıń esap-kitapları islep shıǵılıp atır. Sonday-aq, kartoshka rezervin jaratıw boyınsha shártnamalar dúzilip, reje tiykarında qoymaxanalarǵa jaylastırıw ilajları alıp barılmaqta.
Azıq-awqat ónimleri rezervin qáliplestiriw ushın muzlatqısh hám qoymaxanalar bar bolǵanı menen ayırım rayonlarda bul jumıslardı jolǵa qoyıw támiyinlenbegen. Jumıs alıp barıp atırǵanlarınıń da islew jaǵdayları úyrenilgende muzlatqısh hám qoymaxanaları háreketsiz turǵanlıǵı anıqlanǵan.
Xalqımızdı gúz-qıs máwsiminde sapalı hám arzan azıq-awqat ónimleri menen támiyinlew, bahalar turaqlılıǵın saqlap turıw maqsetinde "Nókis arzan ónimler" ónimlerdi tayarlaw kárxanasına tiyisli qarjılar ajıratılıp, bazarlarımızǵa ónimlerdi alıp keliw, muzlatqıshlarda saqlaw hám zárúrligine qarap satıwǵa shıǵarıw boyınsha bir qatar áhmiyetli wazıypalar belgilep alındı.
Sonıń menen birge májiliste bir qatar áhmiyetli máseleler sın kóz-qarasta qarap shıǵılıp, juwapkerler eskertildi.
Qaraqalpaqstan Respublikası Joqarǵı Keńesiniń Málimleme xızmeti