Búgin «Barsakelmes» mámleketlik buyırtpa qorıqxanası aymaǵında jaylasqan «Gúrkirewik» bulaq suwı átirapındaǵı ekosistemanı úyrenip shıǵıw hámde ekoturizmdi rawajlandırıw ilajları haqqındaǵı máselelerge arnalǵan májilis bolıp ótti
1065
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev Ústirt tegisligi aymaǵındaǵı jer astı suwları rezervin tereń úyreniw, olardıń xalıq xojalıǵında hám sanaat tarawında paydalanıw perspektivaların anıqlaw kerekligin atap ótti.
Aytıp ótiw orınlı, Ministrler Kabinetiniń 2022-jıl 31-oktyabrdegi 507-sanlı arnawlı qararına muwapıq shólkemlestirilgen «Barsakelmes» mámleketlik buyırtpa qorıqxanası aymaǵında jergilikli xalıq tilinde «Gúrkirewik» dep atalatuǵın jer astı bulaq suwı deregi jaylasqan.
Anıqlanǵan bulaq suwınıń tábiyiy jaylasıw ornı hám qorshaǵan ortalıqqa tásirin anıqlaw maqsetinde usı jıldıń 24-may kúni isshi topar tárepinen dáslepki úyreniw jumısları alıp barılıp, aymaqta ekoturizmdi rawajlandırıw, ósimlikler hám haywanatlar dúnyasın keńeytiw, olardı saqlap qalıw hám kóbeytiw maqsetinde suwdıń rezervi boyınsha keń kólemli gidrogeologiyalıq izertlewler alıp barıw kerekligi usınıs etilgen.
Sońǵı jıllarda baqlanıp atırǵan suw tamtarıslıǵın inabatqa alıp, Ústirt tegisligi aymaǵındaǵı jer astı suwları rezervin tereń úyreniw, olardıń xalıq xojalıǵında hám sanaat tarawında paydalanıw perspektivaların anıqlaw maqsetke muwapıq esaplanadı.
Májiliste «Barsakelmes» mamleketlik buyurtpa qorıqxanası aymaǵında «Gúrkirewik» bulaq suwı átirapında ekoturistik aymaq shólkemlestiriw hám marshurtlar islep shıǵıw joybarı hám basqa da áhmiyetli máseleler boyınsha sóz etildi.
Qaraqalpaqstan Respublikası Joqarǵı Keńesiniń Málimleme xızmeti