Joqarǵı Keńes Baslıǵı «Kerder» awılında ámelge asırılıp atırǵan jumıslar menen jaqınnan tanıstı

Húrmetli Prezidentimizdiń basshılıǵında puqaralarımızdıń kúndelikli turmısında ushırasıp atırǵan mashqalalardı sheshiw, ámelge asırılıp atırǵan reformalardıń hár bir shańaraqqa kirip barıwın támiyinlew, máhállelerdi hár tárepleme abat etiw hám eń shetki aymaqlardı da payızlı máhállelerge aylandırıw boyınsha keń kólemli jumıslar alıp barılmaqta. Qaraqalpaqstan Respublikası Joqarǵı Keńesiniń Baslıǵı Amanbay Orınbaev alıp barılıp atırǵan keń kólemli abadanlastırıw jumısları, puqaralardıń abadan turmısın támiyinlew baǵdarındaǵı ámeliy ilajlar menen jaqınnan tanısıw maqsetinde Nókis rayonınıń shetki aymaqlarınıń biri bolǵan «Kerder» awıl puqaralar jıyınına bardı.

  Dáslep Joqarǵı Keńes Baslıǵı awıl puqaralar jıyını aymaǵında shólkemlestirilgen «Arzanlastırılǵan awıl xojalıǵı hám azıq-awqat ónimleri yarmarkası»n barıp kórdi. Aytıp ótiw orınlı, yarmarkada awıl xalqı ushın birinshi dárejeli kerekli azıq-awqat ónimleri alıp kelingen bolıp, arzanlastırılǵan bahada satılmaqta.

  Bunnan soń, «Ata miyras» kóshesinde jaylasqan «Balalar maydanshası»nıń qurılıs jumısları kózden ótkerildi. Aldın bul máhálle aymaǵında balalar ushın birde-bir oyın maydanshası qurılmaǵan. Sonlıqtan, awıl balaları ushın oyın maydanshası mashqalalardıń biri bolıp kelgen edi. Búgingi kúnde bul másele de óz sheshimin tappaqta. Joqarǵı Keńes Baslıǵı aymaqta alıp barılıp atırǵan barlıq qurılıs jumıslarınıń óz waqtında, sapalı alıp barılıwı turaqlı túrde qadaǵalawda bolatuǵının atap ótti.

  Aytıp ótiw kerek, máhállede 2 km jolǵa asfalt, 2,1 km ЩPS tósew, 358 elektr baǵanasın hám 1 transformator punktin ońlaw, aymaqtaǵı bazardı ońlaw, 1 mini futbol maydanshası, balalar maydanshasın, mádeniyat sarayı imaratın qurıw, 20 km ishimlik suw tarmaǵın jańadan tartıw sıyaqlı qatar jumıslar dawam etpekte.  

Qaraqalpaqstan Respublikası Joqarǵı Keńesiniń Málimleme xızmeti