Alıs «Kerder» awılında bayram saltanatı kóterińki ruwxta ótkerildi

Búgingi kúnde Nókis rayonınındaǵı «Kerder» awıl puqaralar jıyını shın mánisinde abadanlastırıw hám qurılıs maydanına aylanǵan. Sebebi, aymaqta «Abat úy, abat kóshe, abat máhálle» ólshemleri tiykarında keń kólemli dóretiwshilik jumısları alıp barılmaqta. Usınday quwanıshlı waqıyalar qatarında awıl puqaralar jıyınında búgin Ózbekstan Respublikası ǵárezsizliginiń 32 jıllıǵı múnásibeti menen bayram saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qızǵın qutlıqladı hám sońǵı jılları elimizde Prezidentimiz basshılıǵında alıp barılıp atırǵan oǵada kólemli jumıslar, puqaralardıń turmıs abadanlıǵın, hár bir insannıń búgingi turmısınan razılıǵın támiyinlew baǵdarındaǵı iygilikli ámeller haqqında atap ótti. Bunnan soń, «Abat shańaraq» tańlawı jeńimpazları sıylıqlandı hám «Jaslar dápteri»ne kirgizilgen bir qatar jaslarǵa subsidiya tiykarında miynet quralları tapsırıldı.

Aytıp ótiw kerek, sońǵı jılları elimizde máhállelerdi abat etiw jolında, eń shetki máhállelerge de itibar qaratılıp, aymaqlardaǵı infrastruktura menen baylanıslı mashqalalardı sheshiw ilajları kórilmekte. Usı tiykarda kópshilik máhálleler úlgili hám abat máskanlarǵa aylanıp, jańasha kóriniske enip atır. «Kerder» awılı da mine usınday orınlardıń biri sıpatında dizimge alınıp, búgingi kúnde reje tiykarında aymaqtaǵı hár bir kóshe, hár bir úydi abat etiw ilajları kórilmekte.

Bayram ilajı mádeniyat hám kórkem óner xızmetkerleri tárepinen tayarlanǵan koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti