Saltanatlı sıylıqlaw máresimi bolıp ótti
1135
Jaqında Ózbekstan Respublikası Prezidentiniń Pármanı tiykarında Ózbekstan Respublikası ǵárezsizliginiń otız eki jıllıǵı múnásibeti menen túrli tarawlarda jemisli miynet etip atırǵan bir qatar qaraqalpaqstanlılar sıylıqlanǵan edi.
Búgin Qaraqalpaqstan Respublikası Joqarǵı Keńesinde usı sıylıqlanǵan jerleslerimizge orden, medal, kókirek belgisi sıyaqlı sıylıqlardı saltanatlı tapsırıw máresimi bolıp ótti.
Onda Joqarǵı Keńes Baslıǵı Amanbay Orınbaev shıǵıp sóylep, barlıq tarawlarda elimiz rawajlanıwı jolında ayanbay miynet etip, kópshilikke úlgi bolıp atırǵan watanlaslarımız barqulla Prezidentimiz itibarında ekenligin atap ótti.
Ilajda Ózbekstan Respublikası Prezidentiniń keńesgóyi T.Xudaybergenov qatnastı.
Saltanatlı ilajda Prezident Pármanı menen sıylıqlanǵan jerleslerimizge sıylıqlar tapsırıldı. Onda búgingi xoshametlew elimiz basshısınıń Qaraqalpaqstanǵa bolǵan ayrıqsha itibarı hám ǵamxorlıǵınıń bir ǵana kórinisi ekenligi, bunnan basqa da respublikamız xalqınıń turmıs abadanlıǵın támiyinlew boyınsha tek ǵana Qaraqalpaqstan ushın bir qatar párman hám qararlar qabıl etilip atırǵanlıǵı, usı tiykarda kóplegen dóretiwshilik jumısları ámelge asırılıp atırǵanlıǵı ayrıqsha tilge alındı.
Qaraqalpaqstan Respublikası Joqarǵı Keńesiniń Málimleme xızmeti