Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdaǵı bir qatar aldıńǵı fermer xojalıqları basshıları menen ushırastı
1133
Onda Ózbekstan Respublikası Prezidentiniń keńesgóyi T.Xudaybergenov qatnastı. Ótkerilgen ushırasıwda búgingidey suw tamtarıslıǵı dáwirinde awıl xojalıǵı egislik maydanlarında suwdı únemlewshi texnologiyalardı engiziw, paxta atızları, baǵlar hám palız maydanlarında ónimlerdi jetistiriwde tamshılatıp suwǵarıw, ǵálle maydanlarında jamǵırlatıp suwǵarıwdan paydalanıwdı en jaydırıw máseleleri sóz etildi.
Aytıp ótiw kerek, sońǵı jılları awıl xojalıǵı egislik maydanları ushın jetkerilip berilip atırǵan aǵın suw muǵdarınıń azayıwı, klimat ózgeriwi hám suwǵa bolǵan talaptıń artıwı sebepli awıl xojalıǵı maydanlarında jańa innovaciyalardı engiziw hám suwdı únemlewshi texnologiyalardı keńnen tartıwdıń áhmiyeti kúnnen-kúnge artıp barmaqta. Bul óz gezeginde xalqımızdı arzan hám sapalı awıl xojalıǵı ónimleri menen támiyinlewdiń kepilligi sıpatında orınlı sheshimlerdiń biri esaplanadı. Ushırasıwda sonday-aq, respublikamızdıń klimatına sáykes hám suwdı az talap etetuǵın eginlerdi egiw, suwdan nátiyjeli paydalanıw, eksportqa ótimli ónimlerdi jetistiriwdi keńeytiw, tájiriybeli ilimpazlar menen tıǵız birge islesiw máseleleri qarap shıǵıldı.
Ótkerilgen ushırasıwda, usı sıyaqlı qatar áhmiyetli máseleler haqqında sóz etildi hám aldaǵı ámelge asırıwı tiyis wazıypalar belgilep alındı.
Qaraqalpaqstan Respublikası Joqarǵı Keńesiniń Málimleme xızmeti