Taxtakópirli 123 jaslı nuranıy anamız Prezidentimiz tárepinen «Shuhrat» medalı menen sıylıqlandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev búgin Taxtakópir rayonındaǵı 100 jastan asqan ardaqlı nuranıy Bibixan Akimniyazovanıń shańaraǵında boldı. Joqarǵı Keńes Baslıǵı Bibixan ana menen jaqınnan sáwbetlesip, húrmetli Prezidentimizdiń tapsırması menen  «Shuhrat» medalın óz iyesine tapsırdı. Bibixan Akimniyazova 1900-jılda Qaraqalpaqstan Respublikası Shımbay rayonında tuwılǵan.

  Ol óziniń miynet jolın 16 jasında Shımbay rayonındaǵı «Babajan» nanbayxanasında nanbayshı bolıp islewden baslaǵan. 1968-jıldan berli Taxtakópir rayonınıń Ózbekstan mákan puqaralar jıyını aymaǵında jasap kelmekte. Bibixan Akimniyazova awıl xojalıǵı hám sharwashılıq jónelislerin rawajlandırıwǵa 66 jıl ómirin baǵıshlaǵan pidayı insan. El azamatlarınıń barlıǵı frontqa atlanǵan ekinshi jáhán urısı dáwirinde, urıstan keyingi xalıq xojalıǵınıń barlıq tarawların qayta tiklew sıyaqlı mashaqatlı jıllarda da óziniń pidayılıǵı menen jemisli miynet etken.

  Ol awıl xojalıǵı tarawında mol tájiriybege hám húrmetke iye bolıp, hár jılǵı paxta jıyım-terim mapazına belsene qatnasıp, Qaraqalpaqstan kóleminde eń aldınǵı paxta terimshisi sıpatında elge belgili boldı.

Qaraqalpaqstan Respublikası Joqarǵı Keńesiniń Málimleme xızmeti