Ózbekstan Respublikası ǵárezsizliginiń otız eki jıllıǵı keń túrde belgilendi
2181
Paytaxtımız Nókis qalasındaǵı oraylıq Amfiteatrda elimiz ǵárezsizliginiń otız eki jıllıǵına baǵıshlanǵan «Jańa turmıs ushın, Jańa Ózbekstan ushın» súreni astında bayram saltanatı bolıp ótti.
Saltanatlı ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, gúllán xalqımızdı eń ullı, eń muqaddes áyyyam – elimiz ǵárezsizliginiń otız eki jıllıǵı bayramı menen qızǵın qutlıqladı.
Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov, Qaraqalpaqstan Respublikası Joqarǵı Keńesiniń deputatları, húkimet aǵzaları, sektor basshıları, ministrlik hám shólkemler, keń jámiyetshilik wákilleri, ǵalaba xabar quralları xızmetkerleri qatnastı.
Atap ótilgenindey, sońǵı jılları elimizde Xurmetli Prezidentimiz basshılıǵında barlıq aymaqlar qatarında Qaraqalpaqstanda da keń kólemli reformalar ámelge asırılıp, elimizdi sociallıq-ekonomikalıq jaqtan rawajlandırıwǵa ayrıqsha itibar qaratılmaqta. Sońǵı bir neshe aydıń ózinde tek ǵana Qaraqalpaqstan ushın bir qatar áhmiyetli párman hám qararlar qabıl etilip, xalqımızǵa múnásip turmıs sharayatın jaratıwǵa bekkem tiykar belgilep berildi.
Sonıń menen birge elimizde kishi biznes hám isbilermenlik, sanaat, xızmet kórsetiw hám awıl xojalıǵı tarawlarında bir qatar investiciyalıq joybarlar ámelge asırıldı. Bunıń nátiyjesinde xalqımız ushın jańa jumıs orınları jaratılıp, bir qatar iri óndiris kárxanaları, kóplegen sociallıq obektler iske túsirildi.
Qaraqalpaqstan Respublikasın sociallıq-ekonomikalıq jaqtan rawajlandırıwǵa qaratılǵan húrmetli Prezidentimizdiń 2022-jıl 31-avgusttaǵı 213-sanlı tariyxıy pármanı qabıl etildi. Bunnan tısqarı, usı jıldıń 8-avgust sánesinde «Qaraqalpaqstan Respublikasında isbilermenlerge qolaylı sharayatlar jaratıwǵa tiyisli qosımsha is-ilajlar haqqında»ǵı PP-129-sanlı jáne bir tariyxıy pármanǵa qol qoyıldı. Usı tiykarda respublikamızda isbilermenlikti rawajlandırıwǵa, jańa jumıs orınların jaratıwǵa hám usı arqalı xalqımızdıń abadan turmısın támiyinlewge úlken sharayat jaratıp berildi.
Bunnan tısqarı, jaslarımızdıń bántligin támiyinlew, joqarı bilim alıwına sharayat jaratıw, kásip-ónerge hám isbilermenlikke úyretiw, hár tárepleme qollap-quwatlaw hám olardıń qábiletin júzege shıǵarıw baǵdarında bir qansha ilajlar ámelge asırılmaqta.
Óz náwbetinde jaslarımız bunday itibar hám ǵamxorlıqqa juwap retinde hár túrli tarawlarda joqarı tabıslardı qolǵa kirgizbekte.
Atap aytqanda, dúnya júzilik kólemdegi xalıq aralıq sport jarısları, Aziya kólemindegi bellesiwlerde elimizdiń bayraǵı bálentlerden jelbirep, mámleketimizdi jer júzine tanıtıp, bir qatar jaslarımızdıń mámleketlik sıylıqlar menen sıylıqlanǵanı bunıń ayqın dálili bolıp esaplanadı.
Bayram saltanatında Ózbekstan hám Qaraqalpaqstan Respublikaları mámleketlik gimnleri atqarıldı.
Saltanatlı bayram ilajı koncert baǵdarlaması menen dawam etti. Baǵdarlamadan orın alǵan kórkem óner sheberleri hám jas talant iyeleri atqarıwındaǵı Watan, doslıq, tınıshlıq hám tatıwlıq, jaslıq haqkındaǵı qosıqlar hám ayaq oyınlar jıynalǵanlarǵa kóterińki keypiyat baǵıshladı.
Qaraqalpaqstan Respublikası Joqarǵı Keńesiniń Málimleme xızmeti