Qaraqalpaqstan Respublikası Joqarǵı Keńesi Baslıǵı Amanbay Orınbaevtıń Ózbekstan Respublikası ǵárezsizliginiń 32 jıllıǵına baǵıshlanǵan saltanatlı máresimdegi sózi

Assalawma áleykum, húrmetli doslar! Áziz Watanlaslar! Qádirli miymanlar! Eń dáslep, usı biyik minberde turıp Sizlerdi hám Sizler arqalı gúllán xalqımızdı Qaraqalpaqstan Respublikası Joqarǵı Keńesi hám Ministrler Keńesi atınan elimiz tariyxındaǵı qutlı sáne, eń ullı hám eń áziz áyyyam – Ǵárezsizligimizdiń 32 jıllıq bayramı menen qızǵın qutlıqlawǵa ruxsat etkeysizler!   Húrmetli Watanlaslar!   Ózlerińiz jaqsı bilesizler, bıyılǵı ǵárezsizlik bayramı húrmetli Prezidentimizdiń arnawlı qararı tiykarında “Jańa turmıs ushın, Jańa Ózbekstan ushın!” degen súren astında ótkerilmekte. Bul súren kewillerge ózgeshe ilham-yosh baǵıshlap, keleshekke degen isenimdi jáne de bekkemlew menen birge, gúllán xalqımızdı iygilikli maqsetlerge hám dóretiwshilik islerge ruwxlandırıwı menen áhmiyetli sanaladı. Jáne de ayta ketetuǵın nárse, elimizdi rawajlandırıw boyınsha Rawajlanıw strategiyası hámde bıyılǵı “Insanǵa itibar hám sapalı bilimlendiriw jılı”nıń bir-biri menen únles keliwi alǵa qoyǵan maqset hám wazıypalarımızdı ámelge asırıwdıń áhmiyetli faktorlarınan biri bolıp tabıladı. Mine, usı tiykarda márt hám keńpeyil xalqımız húrmetli Prezidentimizdiń basshılıǵında rawajlanıwdıń jańa basqıshına – Úshinshi Renesansqa qaray isenimli qádem qoymaqta.   Óytkeni, ǵárezsiz elimizde húrmetli Prezidentimiz baslap bergen baxıtlı turmıs hám jarqın keleshekke baǵdarlanǵan anıq maqsetler tiykarında xalqımız turmısında, qala hám awıllarımız kelbetinde kún sayın ózlerisler menen jańalanıwlar júz bermekte. Ásirese, jaslarımızǵa, hayal-qızlarımızǵa hám isbilermenlerimizge burın bolmaǵan kóplegen jeńilliklerdiń beriliwi,  252 puqaralar jıyınlarındaǵı 289 infra-struktura obektlerinde derlik 294 mlrd.swmlıq qurılıs-ońlaw jumıslarınıń alıp barılıwı, jaslarımız ushın joqarı oqıw orınlarına kiriw ushın qosımsha 10 mıń kvotanıń ajıratılıwı, sırt ellerde oqıp atırǵan student-jaslarımızdıń oqıwın elimizdegi joqarı oqıw orınlarına kóshiriw ámeliyatınıń jolǵa qoyılıwı, qala hám rayonlarımızda jámi 21 mıńnan aslam turaq-jaylarda 350 mlrd. swmlıq qurılıs-ońlaw jumısları ámelge asırılıwı – bular burın hesh qashan bolmaǵan tariyxıy waqıyalardan sanaladı.   Qalaberse, dáwir qaharmanları, ekonomikamızdıń drayveri sanalǵan Qaraqalpaqstanlı isbilermenlerge qaratılıp atırǵan itibar hám olarǵa berilip atırǵan jeńillikler ushın qanshelli minnetdar bolsaq ta arzıydı! Qaraqalpaqstanǵa degen bunday atalarsha ǵamxorlıǵı ushın pútkil xalqımız atınan húrmetli Prezidentimizge mıń-mıńlap raxmetler aytamız!   Qádirli doslar!   Sonı ayrıqsha atap ótiwimiz tiyis, sońǵı jılları elimizdiń barlıq aymaqları qatarında Qaraqalpaqstan da úlken dóretiwshilik maydanına aylanıp barmaqta.   Mine, bıyılǵı jıldıń ózinde Investiciya baǵdarlaması tiykarında derlik 638 mlrd.swmlıq qarjı esabınan 94 sociallıq hám infrastruktura obektlerinde qurılıs-ońlaw jumısları alıp barılmaqta. Tek ǵana Nókis qalasınıń ózinde paytaxtımızdıń arxitekturalıq kelbetin jańalaw hám xalıqtıń jasaw sharayatların jáne-de jaqsılaw maqsetinde 30 dan aslam kóp qabatlı turaq-jaylar qurılıp atırǵan bolsa, awıllıq jerlerde xalıqtı zamanagóy hám ıqsham turaq-jaylar menen támiyinlew maqsetinde Qaraózek, Kegeyli hám Qanlıkól rayonlarında “Jańa Ózbekstan” massivlerinde 23 kóp qabatlı turaq-jaylar jańadan boy tiklemekte. Jáne de ayrıqsha ayta ketetuǵın nárse, húrmetli Prezidentimizdiń Qaraqalpaqstanǵa bolǵan hár bir saparı xalqımız ushın mol ırısqı-nesiybe, dáwlet hám ıǵbal, baxıt alıp kelmekte. Usı jıl mart ayında Qaraqalpaqstanǵa saparı dawamında berilgen tapsırmaları tiykarında, Ministrler Keńesi janında mádeniyattı qollap-quwatlaw fondın shólkemlestirip, oǵan 20 milliard swm ajıratıw, 452 máhálleniń hár birine 500 million swmnan qosımsha qarjı ajıratıw, kadastrı joq 43 mıńnan aslam turaq-jaylardıń kadastr hújjetlerin islep beriw, 4 mıń turaq jay qurıw hámde zamanagóy joybarlar tiykarında 4 mıń jeke tártiptegi turaq jaylar qurıw ushın 4 sotixdan jer ajıratıw, puqaralarǵa diyqanshılıq penen shuǵıllanıwǵa beriletuǵın jerlerde sharwaǵa azıqlıq jetistiriw ushın 5 gektarǵa shekem ajıratıw sıyaqlı bir wazıypalar belgilep alındı. Bunnan tısqarı, Húrmetli Prezidentimizdiń baslaması menen kelesi 7 jıl ishinde Qaraqalpaqstanda ámelge asırılatuǵın bir qatar wazıypalar belgilep alındı. Atap aytqanda, kelesi jılı qaraqalpaq klassik ádebiyattıń kórnekli wákili Ájiniyaz Qosıbay ulınıń 200 jıllıǵı múnásibeti menen mánawiyat hám ádebiyat bayramın ótkeriw, Moynaq rayonında Ájiniyaz atındaǵı ekoparkin qurıw, Beruniy babamızdıń 1050 jıllıǵın xalıq-aralıq dárejede ótkeriw, kelesi 7 jılda qosımsha 30 jańa mektep, 150 mektep ushın qosımsha imarat qurıw hámde 350 mektep ońlaw arqalı qosımsha 100 mıń jańa oqıwshı orınların jaratıw, Qaraqalpaqstanda agro-texnologiyalar hám injenerlik baǵdarlarında jetekshi shet el joqarı oqıw orınlarınıń filialların hámde Nókiste sanlı texnologiyalar institutın ashıw, kelesi jıldan baslap Taxtakópir, Shımbay, Qaraózek, Bozataw, Shomanay, Qońırat rayonlarında jumıs alıp barıp atırǵan medicina tarawı xızmetkerlerine 200 procentlik aylıq ústeme tólew, paytaxtımız Tashkent qalasında bar bolǵan barlıq zamanagóy medicina xızmetlerin kelesi jıllarda Nókis qalasında da jolǵa qoyıw sıyaqlı maqtanısh etiwge arzıytuǵın jumıslardıń ámelge asırılıwı kútilmekte.   Jańadan-jańa imkaniyatlar esigin ashıp, sheksiz hám biybaha qollap-quwatlawları ushın pútkil xalqımız atınan húrmetli Prezidentimizge jáne bir márte mıń-mıńlap raxmetler aytamız!   Áziz watanlaslar!   Búgingidey jańalanıwlar hám rawajlanıwlar dáwirinde elimizde júz berip atırǵan keń kólemli iygilikli islerge úles qosıw, xalqımızdıń turmıs dárejesin bunnan bılay-da jaqsılaw, ekonomikamızdı ele de bekkemlew jolında xızmet etiw, milletler-aralıq tatıwlıqtı, doslıq qatnasıqların bekkemlew, eń tiykarǵı baylıǵımız bolǵan tınıshlıqtı saqlaw, onıń qádirine jetiw, húrmetli Prezidentimizdiń xalqımızǵa degen ǵamxorlıǵına is penen juwap qaytarıw – bul usı elde jasap hám miynet etip atırǵan hár bir insan ushın ádiwli minnet hám parız bolıwı tiyis! Óytkeni, aspanı ashıq, tábiyatı bay, kóp milletli xalqı keńpeyil, dana Elbasshısı bar Ózbekstanday elde jasaw – bul úlken baxıt! Bársheńizdi jáne bir márte Ǵárezsizligimizdiń 32 jıllıq bayramı menen qızǵın kutlıqlayman.   Sizlerge bekkem densawlıq, shańaraqlarıńızǵa amanlıq tiley otırıp, elimizdiń jáne-de gúllep-rawajlanıwı, xalqımızdıń baxıtlı hám abadan turmısı jolındaǵı barlıq jumıslarıńızda tabıslar tileymen!  

Amanbay Orınbaev

Qaraqalpaqstan Respublikası Joqarǵı Keńesiniń Baslıǵı