Joqarǵı Keńes Baslıǵı Nókis qalasındaǵı 1-sanlı ulıwma bilim beriw mektebi oqıwshıların jańa oqıw jılı menen qutlıqladı

Búgin respublikamızdıń barlıq orınlarındaǵı mekteplerde jańa oqıw jılınıń baslanıwı múnásibeti menen bayram ilajları ótkerilmekte. Nókis qalasındaǵı 1-canlı ayırım pánler tereńlestirilip oqıtılatuǵın klası bar ulıӯma orta bilim beriӯ mektebinde ótkerilgen ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı. Dáslep, Ózbekstan hám Qaraqalpaqstan Respublikaları mámleketlik gimni atqarıldı.

  Bunnan soń, Joqarǵı Keńes Baslıǵı shıǵıp sóylep, jıynalǵanlardı eń ullı hám eń áziz bayram – Ǵárezsizligimizdiń 32 jıllıǵı, sonday-aq, búgingi umıtılmas kún – jańa oqıw jılınıń baslanıwı múnásibeti menen qutlıqladı. Aytıp ótiw orınlı, sońǵı jılları húrmetli Prezidentimiz tárepinen bilimlendiriw tarawına ayrıqsha itibar qaratılıp, bul baǵdarda ósip kiyatırǵan jas áwladtı ana Watanǵa sadıqlıq ruwxında tárbiyalaw, olardı ozıq oylı, fizikalıq jaqtan shınıqqan hár tárepleme jetik insanlar etip kamalǵa keltiriw baǵdarında kólemli jumıslar alıp barılmaqta. Usı tiykarda bilim máskani esaplanǵan mekteplerdiń materiallıq-texnikalıq bazası bekkemlenip, jańa, zamanagóy, búgingi dáwir talaplarına sáykes bilim beriwdi ele de jetilistiriw boyınsha kóplegen ámeliy ilajlar dawam ettirilip atır.

  Ótkerilgen ilajda birinshi qońıraw qaǵıldı. Bunnan soń, ósip kiyatırǵan jas áwladtı tárbiyalawda hám olarǵa bilim beriwde jemisli miynet etip atırǵan bir qatar ustaz-pedagoglarǵa Joqarǵı Keńestiń kókirek belgileri, mektep jámááti ushın bahalı sawǵalar tapsırıldı. Ilaj dawamında 1-klassqa qádem qoyıp atırǵan oqıwshılarǵa “Prezident sawǵa”ları berildi.

  Joqarǵı Keńes baslıǵı sonday-aq, mektepte oqıwshı-jaslar ushın jaratılǵan imkaniyatlar menen jaqınnan tanıstı.  

Qaraqalpaqstan Respublikası Joqarǵı Keńesiniń Málimleme xızmeti