Densawlıqtı saqlaw ministrliginiń jumısın jáne de jetilistiriw ilajları haqqında

Ózbekstan Respublikası Prezidentiniń pármanı

Densawlıqtı saqlaw tarawındaǵı reformalardı izbe-iz dawam ettiriw, sonıń ishinde, basqarıwdı jetilistiriw, tarawdı rawajlandırıwdıń keleshektegi perspektivaların belgilew, medicina mákemeleriniń materiallıq-texnikalıq bazasın bekkemlew hám mámleketlik múlk obektlerinen nátiyjeli paydalanıwdı shólkemlestiriw arqalı sapalı medicinalıq xızmetler kórsetiw kólemin keńeytiw maqsetinde: Xalıqtıń salamat turmıs tárizin qollap-quwatlaw hám fizikalıq belsendiligin arttırıw orayı Salamatlıq hám strategiyalıq rawajlanıw institutı (keyingi orınlarda – Institut) etip qayta shólkemlestirilsin. Tómendegiler Instituttıń tiykarǵı wazıypaları etip belgilensin: salamat turmıs tárizin qáliplestiriw, juqpalı bolmaǵan keselliklerge qarsı gúresiw hám aldın alıw boyınsha baǵdarlamalardı islep shıǵıw hám ámelge asırıw; salamat turmıs tárizin úgit-násiyatlaw, zıyanlı ádetlerge qarsı gúresiw hám aldın alıw boyınsha baǵdarlamalardı islep shıǵıw hám ámelge asırıw; salamat turmıs tárizin úgit-násiyatlaw, zıyanlı ádetlerge qarsı gúresiw, xalıqtıń turaqlı medicinalıq mádeniyatın qáliplestiriw boyınsha kompleksli ilajlar islep shıǵıw hám ámelge asırıw; aldıńǵı hám qolaylı sırt el tájiriybesi tiykarında densawlıqtı saqlaw sisteması jumısınıń baslı baǵdarları, orta múddetli hám uzaq múddetli rawajlanıw scenariyları hám strategiyaları boyınsha ilimiy tiykarlanǵan usınıslar islep shıǵıw; medicinalıq statistikanı qáliplestiriw hám alıp barıw, statistikalıq kórsetkishlerdi qáliplestiriwde xalıqaralıq standartlar hám metodikalardı engiziw boyınsha usınıslar islep shıǵıw, medicina tarawındaǵı statistikalıq maǵlıwmatlardı jıynaw, qayta islew, ulıwmalastırıw, tallaw, tarqatıw hám saqlaw baǵdarındaǵı jumıslardı jetilistiriw. 2024-jıl 1-yanvardan Institut hám onıń aymaqlıq bólimleri xızmetkerleriniń miynetine haqı tólew, materiallıq xoshametlew hám sociallıq qorǵaw shártlerine bola, tiyisli túrde, Densawlıqtı saqlaw ministrligi hám onıń aymaqlıq basqarıw uyımlarınıń xızmetkerlerine teńlestiriletuǵını belgilensin. Densawlıqtı saqlaw ministrligi Institut penen birgelikte eki ay múddette 2024-2026-jılları salamat turmıs tárizin qáliplestiriw, durıs awqatlanıwdı sistemalı úgit-násiyatlaw hám ǵalaba en jayıdırıw baǵdarlamasın islep shıqsın hám onda, tómendegilerdi názerde tutsın; salamat turmıs tárizin qáliplestiriwge qaratılǵan jılına 25 ke shekem promo-rolikler, baǵdarlama hám telekórsetiwler tayarlaw; uyalı telefon paydalanıwshılarına kesellikler profilaktikası hám salamat turmıs táriziniń tiykarları boyınsha hár kúni qısqa xabarlar (SMS) jiberiw; jurnalistler hám basqa da baspasóz wákilleri arasında hár jılı «Salamat turmıs tárizi boyınsha jıldıń eń jaqsı úgit-násiyatshısı» tańlawın ótkeriw; bazarlar, samolyot, poezd, avtobus, metro, supermarketler hám puqaralar kóp jıynalatuǵın basqa da orınlarda salamat turmıs tárizi boyınsha rolikler qoyıp beriw, radiomásláhátler beriw hám bukletler tarqatıwdı támiyinlew. Densawlıqtı saqlaw ministrligi xalıqaralıq shólkemler hám sırt el konsalting kompaniyaların tartqan halda 2023-jıldıń aqırına shekem aldıńǵı tájiriybe tiykarında tómendegilerge tiykarǵı itibardı qaratqan halda «Xalıq salamatlıǵı-2030» milliy strategiyası islep shıǵılıwın támiyinlesin: xalıqtı maksimal qamtıp alǵan halda baslanǵısh medicinalıq-sanitariya xızmetin oǵan jáne de jaqınlastırıw; puqaralardıń salamat turmıs tárizin, salamat awqatlanıwın hám fizikalıq belsendiligin qollap-quwatlaw, olardı xalıq arasında hár tárepleme úgit-násiyatlaw; analıqtı hám balalıqtı qorǵaw, xalıqtıń bul baǵdardaǵı talapların qanaatlandırıw; qánigelesken medicinalıq járdem kólemin keńeytiw; densawlıqtı saqlaw sistemasın tolıq sanlastırıw, qaǵazpazlıqqa, tiykarsız byurokratiyaǵa hám gezeklerge shek qoyıw, xalıqqa medicina mákemelerine múrájat etkeninde qolaylıqlar jaratıw; zamanagóy hám nátiyjeli basqarıw usılların engiziw hám medicinalıq xızmetlerdiń sapasın arttırıw; kadrlar potencialın arttırıw, medicinalıq bilimlendiriw hám ilimdi rawajlandırıw; jeke menshik sektordı rawajlandırıw hám investiciyalardı tartıw sonday-aq, iri mámleketlik-jeke menshik sheriklik joybarların ámelge asırıw; medicina mákemeleriniń materiallıq-texnikalıq bazasın bekkemlew; farmacevtika tarmaǵın nátiyjeli tártipke salıw. Tómendegiler Densawlıqtı saqlaw ministrliginiń strukturasına ótkerilsin: Farmacevtika tarmaǵın rawajlandırıw agentligi; 2024-jıl 1-yanvardan Mámleketlik medicinalıq qamsızlandırıw qorı. Usı Pármannıń 5-bántinde kórsetilgen mákemeler Densawlıqtı saqlaw ministrliginiń strukturasına erkin yuridikalıq tárep statusı hám olardıń jumısın qarjılandırıwdıń ámeldegi dárekleri hám tártibin saqlap qalǵan halda ótkeriletuǵını; Farmacevtika tarmaǵın rawajlandırıw agentligi farmacevtika sanaatı turaqlı rawajlanıwı ushın juwapkershilikti tolıq juwapkershillikke alatuǵını; Mámleketlik medicinalıq qamsızlandırıw qorınıń baqlaw keńesi medicinalıq járdemniń kepillengen kólemi sheńberinde medicinalıq xızmet kórsetiw ushın tartılatuǵın jetkerip beriwshiler (mámleketlik hám mámleketlik emes)di, satıp alınatuǵın medicinalıq járdemler kólemin erkin belgileytuǵını hám óz byudjetin qáliplestiretuǵını; Mámleketlik medicinalıq qamsızlandırıw qorı 2027-jıl 1-yanvardan Densawlıqtı saqlaw ministrligi quramınan shıǵatuǵını hám erkin qor sıpatında jumıs alıp baratuǵını; Mámleketlik byudjet qarjıları esabınan jeńilletilgen kategoriyaǵa kiriwshi shaxslarǵa diagnoz qoyıw hám emlew boyınsha tastıyıqlanǵan standartlarǵa muwapıq medicinalıq xızmetlerdiń bazalıq bahaları Densawlıqtı saqlaw ministrligi tárepinen Ekonomika hám qarjı ministrligi sonday-aq, Básekini rawajlandırıw hám tutınıwshılardıń huqıqların qorǵaw komiteti menen kelisilgen halda belgilenetuǵını; densawlıqtı saqlaw ministri hám Mámleketlik medicinalıq qamsızlandırıw qorı atqarıwshı direktorı 2026-jıldıń aqırına shekem medicinalıq qamsızlandırıwdıń respublika boylap tolıq engiziliwi ushın jeke juwapker bolıp esaplanatuǵını belgilensin. 2024-jıl 1-yanvardan Densawlıqtı saqlaw ministrligi janında tómendegilerdi birlestiriw arqalı yuridikalıq tárep statusına iye bolmaǵan Medicinanı rawajlandırıw mámleketlik maqsetli qorı (keyingi orınlarda – Medicinanı rawajlandırıw qorı) shólkemlestirilsin: Onkogematologiyalıq hám emlew qıyın bolǵan keselliklerge shatılǵan nawqaslardı salamatlandırıwǵa járdeslesiw qorı; Qıstawlı medicinalıq járdemdi rawajlandırıw qorı; Qábiletli hám tájiriybeli medicina qánigelerin qollap-quwatlaw hám medicina mákemelerine tartıw qorı; Spinal bulshıq et atrofiyası diagnozı qoyılǵan nawqas balalardı qollap-quwatlaw qorı. Tómendegiler 2024-jıl 1-yanvardan Medicinanı rawajlandırıw qorınıń qarjıların qáliplestiriw dárekleri etip belgilensin: Mámleketlik byudjetten hár jılı ajıratılatuǵın 350 milliard sum muǵdarındaǵı qarjılar; spinal bulshıq et atrofiyası diagnozı qoyılǵan balalarǵa medicinalıq-sociallıq járdem kórsetiw hám dári quralların biypul jetkerip beriw qárejetleri ushın Mámleketlik byudjetten ajıratılatuǵın qarjılar; qábiletli hám tájiriybeli medicina qánigelerin qollap-quwatlaw sonday-aq, medicina mákemelerine tartıw ushın Mámleketlik byudjetten hár jılı ajıratılatuǵın 50 milliard sum muǵdarındaǵı qarjılar; Densawlıqtı saqlaw ministrligi sistemasındaǵı mákemeler hám shólkemlerdiń bos turǵan imaratları, kóshpes múlk obektleri hám jer uchastkaların ǵalabalıq sawdalar (aukcion)da satıwdan túsetuǵın qarjılardıń respublikalıq byudjetke ótkeriletuǵın 50 procenti; Densawlıqtı saqlaw ministrligi sistemasındaǵı mákeme hám shólkemlerdiń múlkin ijaraǵa beriwden túsetuǵın túsimlerdiń, Mámleketlik múlk obektlerinen nátiyjeli paydalanıw orayınıń operaciyalıq qárejetlerin shegirip taslaǵan halda, jergilikli byudjetlerge ótkeriletuǵın 100 procenti; xalıqaralıq finans institutlarınıń, húkimetlik hám húkimetlik emes shólkemlerdiń grantları hám texnikalıq járdem qarjıları; Ǵaznashılıq xızmeti komiteti tárepinen Medicinanı rawajlandırıw qorınıń waqtınsha bos qarjıların kommerciyalıq bankler depozitlerine jaylastırıwdan alınatuǵın dáramatlar; fizikalıq hám yuridikalıq táreplerdiń qáwenderlik qayırqomlıqları; nızamshılıq hújjetlerinde qadaǵan etilmegen basqa da dárekler. Medicinanı rawajlandırıw qorınıń qarjıları tómendegilerge jumsalatuǵını: densawlıqtı saqlawdı basqarıw uyımları hám Densawlıqtı saqlaw ministrligi sistemasındaǵı mámleketlik medicinalıq mákemelerdiń materiallıq-texnikalıq bazasın bekkemlew, programmalıq ónimler satıp alıw hám málimleme-kommunikaciya tarmaqlarına texnikalıq xızmet kórsetiw; medicinalıq ásbap-úskeneler, kompyuterler, planshetler, multimedia hám tarmaq qurılmaları, baǵdarlamalıq támiynatlardı satıp alıw, málimleme-kommunikaciya texnologiyaların keńnen engiziw hám rawajlandırıw; densawlıqtı saqlawdı basqarıw uyımları hám Densawlıqtı saqlaw ministrligi sistemasındaǵı mámleketlik medicinalıq mákemeleriniń xızmetkerlerin sırt elde tayarlaw hám qayta tayarlaw, sonday-aq, oqıtıw, qánigelik arttırıw hám tájiriybe almasıwdı respublikada shólkemlestiriw ushın sırt el qánigelerin tartıw menen baylanıslı qárejetlerdi qarjılandırıw; densawlıqtı saqlawdı basqarıw uyımları, sonday-aq, Densawlıqtı saqlaw ministrligi sistemasındaǵı mákemeler hám shólkemlerdiń kadrlar potencialın bekkemlewge qaratılǵan ilajlardı qarjılandırıw; onkogematologiyalıq hám emlew qıyın bolǵan kesellikler boyınsha joqarı texnologiyalıq quramalı operaciyalardı ámelge asırıw ushın qánigelerdi, sonıń ishinde, sırt el qánigelerin tartıw; jergilikli hám sırt el ekspertleri hám konsalting shólkemlerin tartıw, densawlıqtı saqlaw tarawındaǵı keń kólemli wazıypalardı ámelge asırıw maqsetinde ekspertlik topardıń jumısın shólkemlestiriw hám qarjılandırıw; onkogematologiyalıq hám emlew qıyın bolǵan keselliklerge shatılǵan nawqaslarǵa medicinalıq járdem kórsetiw ushın tiyisli medicina mákemelerin kapital hám aǵımdaǵı ońlaw, qurıw hám rekonstrukciyalaw, olarǵa ásbap-úskeneler, dári quralları, medicinalıq qurallar, laboratoriya reaktivleri hám basqa da kerekli quralların satıp alıw; Densawlıqtı saqlaw ministrligi tárepinen tastıyıqlanǵan dizim tiykarında awır kesellikke shatılǵan jetim balalar hám ata-ana qaramaǵınan ayırılǵan balalardıń respublikada ámelde asırılmaytuǵın xirurgiyalıq operaciyalardı sırt ellerde ótkeriwge baylanıslı qárejetlerdi qaplaw; onkogematologiyalıq hám emlew qıyın bolǵan keselliklerge shatılǵan nawqaslarǵa respublika aymaǵındaǵı mámleketlik hám mámleketlik emes medicina shólkemleriniń joqarı texnologiyalıq diagnoz hám emlew-profilaktika xızmetlerin satıp alıw qárejetlerin qaplaw; Densawlıqtı saqlaw ministrligi sisteması xızmetkerlerin oqıtıw, qayta tayarlaw hám stajirovkasın shólkemlestiriw, sonıń ishinde, sırt ellerge saparların, Ózbekstan aymaǵınan tısqarıda ótkeriletuǵın konferenciyalar, seminarlar hám basqa da ilajlarda qatnasıwın, xızmet saparına jiberiliwin shólkemlestiriw menen baylanıslı qárejetlerdi qaplaw; joqarı hám orta medicina bilimlendiriw mákemeleriniń qábiletli studentlerine arnawlı stipendiyalar tólewge jumsalatuǵın qárejetlerdi qarjılandırıw; Medicinanı rawajlandırıw qorı hám onıń direkciyası, sonday-aq, Institut hám onıń aymaqlıq bólimleriniń jumısın shólkemlestiriw hám qollap-quwatlawǵa baylanıslı qárejetlerdi qaplaw; Densawlıqtı saqlaw ministrligine júklengen wazıypalardı orınlawǵa qaratılǵan basqa da ilajlardı sonday-aq, densawlıqtı saqlaw tarawında alıp barılıp atırǵan reformalardı ámelge asırıw menen baylanıslı qárejetlerdi qarjılandırıw. 2024-jıl 1-yanvardan Densawlıqtı saqlaw ministrligi oraylıq apparatı strukturasında ministrlik basqarma xızmetkerleriniń ulıwma sheklengen sanı sheńberinde yuridikalıq tárep statusına iye bolmaǵan Medicinanı rawajlandırıw qorı direkciyası shólkemlestirilsin. Medicinanı rawajlandırıw qorı usı Pármanda názerde tutılǵan birlestirilip atırǵan qorlardıń barlıq minnetlemeleri hám dáramatlar dárekleri boyınsha huqıqıy miyrasxorı bolıp esaplanatuǵını; Medicinanı rawajlandırıw qorınıń qarjıları onıń baqlaw keńesi qararına tiykarlanıp qatań túrde usı Pármanda kórsetilgen baǵdarlarǵa qaratılatuǵını; Medicinanı rawajlandırıw qorınıń aǵımdaǵı finans jılında paydalanılmaǵan (ózlestirilmegen) qarjıları keyingi finans jılına ótkeriletuǵını belgilensin. Densawlıqtı saqlaw ministrligi hám Ádillik ministrligi bir ay múddette Medicinanı rawajlandırıw qor haqqındaǵı rejeni sonday-aq, onıń baqlaw keńesi quramın tastıyıqlasın. Onda, Medicinanı rawajlandırıw qorı qarjıların jumsawdıń ashıq-aydın tártibin, onıń dáramatları hám qárejetleri haqqında esap beriwshilikti, sonday-aq, jumısınıń ashıq-aydınlıǵın támiyinlew máselelerin názerde tutıw. Ózbekstan Respublikası Prezidentiniń ayırım hújjetlerine qosımshaǵa muwapıq ózgerisler kirgizilsin. Densawlıqtı saqlaw ministrligi Ádillik ministrligi menen birgelikte bir ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıs kirgizsin. Usı Pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası densawlıqtı saqlaw ministri A.Sh.Inoyatovqa júklensin. Ózbekstan Respublikası Prezidenti Sh.MIRZIYoEV Tashkent qalası, 2023-jıl 6-sentyabr