Shımbay rayonında alıp barılıp atırǵan jumıslar sın kóz-qarasta talqılandı
2460
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonın sociallıq-ekonomikalıq jaqtan rawajlandırıw, puqaralarǵa múnásip turmıs sharayatın jaratıw hám xalıqtıń abadan turmısın támiyinlew baǵdarında ámelge asırılıp atırǵan jumıslar hám bul baǵdarda jol qoyılıp atırǵan kemshiliklerge arnalǵan májilis ótkerdi.
Onda barlıq juwapkerler hám rayonlıq mákeme, kárxana hámde shólkem basshıları qatnasıp, barlıq máseleler sın kóz qarasta qarap shıǵıldı.
Aytıp ótiw orınlı, barlıq qala hám rayonlarda aymaqlardı hár tárepleme rawajlandırıw boyınsha májilisler ótkerilip, usı tiykarda wazıypalar belgilep berilgen edi. Tilekke qarsı, Shımbay rayonında usı belgilengen wazıypalardı orınlawda qatar kemshilikler anıqlanǵan.
2023-jılı rayonda baǵdarlama tiykarında 9117 jańa jumıs orınların shólkemlesitiriw belgilengen bolsa, wazıypa tolıq orınlanbastan jańa jumıs orınları jaratıldı dep esabatlarǵa qosıp jazıwlar anıqlanǵan. Ayırım jaǵdaylarda rayonda islenbegen jumısqa artıqsha is haqı tólew sıyaqlı nızam buzılıw jaǵdayları da ushıraspaqta.
Jergilikli byudjet dáramatlar bazasın bekkemlew hám oraylastırılmaǵan halda aymaqlardı kompleksli rawajlandırıwdı turaqlı qarjılandırıw, kishi biznes hám jeke isbilermenlikke kómeklesiw boyınsha wazıypalar belgilep berilgen bolsa da, bul baǵdardaǵı jumıslar rayonlıq Ekonomika hám finans bólimi tárepinen jeterli dárejede jolǵa qoyılmaǵan.
Shımbay rayonlıq salıq inspekciyası baslıǵı tárepinen ózine júkletilgen wazıypalarǵa nemquraydılıq penen qaraǵanlıǵı sebepli byudjet túsimlerinde kѳplegen mashqala hám kemshilikler ushıraspaqta.
Bunnan tısqarı rayonda bir qatar finanslıq qáte-kemshilikler anıqlanǵan, ishimlik suw, gaz hám elektr energiyası ushın qarızdarlıqlardı óndiriw durıs jolǵa qoyılmaǵan. Mámleketlik satıp alıwlar boyınsha tańlaw sawdaları ótkerilgende nızam buzıwshılıqlar júz bergen.
Prezidentimizdiń 2021-jıldaǵı PQ-5152-sanlı qararı menen belgilengen kóp qabatlı úyler átirapın ońlaw jumısları ayırım orınlarda búgingi kúnge shekem baslanbaǵan. Ministrler Kabinetiniń 2022-jıl 6-sentyabr kúngi 500-sanlı qararı boyınsha sektor basshıları tárepinen shólkemlestiriw ilajları talap dárejesinde orınlanbaǵan.
Kishi biznes subektlerin ashıw boyınsha yanvar-iyun aylarına belgilengen rejege salıstırǵanda 1-iyul jaǵdayına rayonda 22 subekt ashılmaǵan. Hákimliktiń esabatında usı jıldıń 1-yarım jılı dawamında kishi biznes subektlerinde jańa jumıs ornı jaratılǵanlıǵı boyınsha artıqsha kórsetkishler qosıp jazılǵan. Rayon aymaǵında iske túsirilgen dep kórsetilgen ayırım biznes subektleri iske túspegenligi anıqlanǵan. 2023-jılǵı Investiciya baǵdarlaması tiykarında jańa joybarlardı iske túsiriw nátiyjesinde jumıs orınları jaratılıwı belgilengen bolsada, hesh qanday jumıslar ámelge asırılmaǵan.
Eksport kórsetkishleri, xalıqtı azıq-awqat ónimleri menen támiyinlew ilajları, egislik maydanlarda suwdı únemlewshi texnologiyalardı keńnen en jaydırıw ilajları talap dárejesinde orınlanbaǵan.
Kámbaǵallıqtı qısqartıw hám xalıqtıń bántligin támiyinlew baǵdarında ayırım jaǵdaylarda kredit qarjıları usı kúnge shekem ajıratılmaǵan. Ajıratılǵan kreditlerdiń ayırımları maqsetsiz jumsalǵan. Kommerciyalıq banklerde mashqalalı qarızdarlıqtı saplastırıw ilajları talap dárejesinde orınlanbaǵan.
Bıyılǵı jılı investiciyalardı kirgiziw, jańa joybarlardı iske túsiriw, eksport kólemin arttırıw jumısları da nátiyjeli jolǵa qoyılmaǵan.
Májiliste usı sıyaqlı jáne bir qatar máseleler sın kóz-qarasta talqılandı.
Ótkerilgen májilis dawamında óz jumısın orınlawda qate-kemshiliklerge jol qoyǵanı ushın rayonlıq Ekonomika hám finans bólimi baslıǵı, Salıq bólimi baslıǵı hám rayonlıq medicina birlespesi baslıǵın iyelep turǵan lawazımınan bosatıw boyınsha tapsırma berildi.
Sonıń menen birge rayon hákiminiń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı, Jaslar isleri agentliginiń shımbay rayonlıq bólimi baslıǵı, Kámbaǵallıqtı qısqartıw hám bántlik bólimi baslıǵınıń orınbasarına intizamıy jaza sharası qollanıldı.
Ótkerilgen májilis juwmaǵında bir qatar wazıypalar belgilep berildi.
Qaraqalpaqstan Respublikası Joqarǵı Keńesiniń Málimleme xızmeti