Kegeyli rayonın rawajlandırıw boyınsha belgilengen wazıypalardıń orınlanıwına arnalǵan májilis ótkerildi
2176
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonın sociallıq-ekonomikalıq jaqtan rawajlandırıw, xalıqtıń bántligin támiyinlew hámde investiciyalıq joybarlardı ámelge asırıw baǵdarında ámelge asırılıwı tiyis jumıslar, belgilengen máseleler hám orınlanǵan wazıypalarǵa arnalǵan májilis ótkerdi. Aytıp ótiw kerek, juwapkerler tárepinen júkletilgen wazıypalardı orınlawda ayırım basshılardıń nemquraydılıǵı sebepli jumıslar talap dárejesinde alıp barılmaǵan. Hayal-qızlar hám jaslardı qollap-quwatlaw, olardıń bántligin támiyinlew, kredit qarjıların ajıratıp beriw, jańa jumıs orınların jaratıw maqsetinde jańa isbilermenlik joybarların iske túsiriw, kishi isbilermenlik subektleriniń jumısların jolǵa qoyıw, bunıń ushın mámleketlik baǵdarlamalar tiykarında jeńilletilgen kredit qarjıları ajıratılıwın támiyinlew ilajları talap dárejesinde alıp barılmaǵan. Jumıs orınları jaratılıwı, kredit qarjıları ajıratılıwı boyınsha qosıp jazıwlar, esabatlarda arttırıp kórsetiw jaǵdaylarına jol qoyılǵan. Bunnan tısqarı, rayonda qurılıs tarawı boyınsha da orınlanbaǵan jumıslarǵa qosıp jazıw, ayırım jaǵdaylarda talan-taraj etiw, jumıslardı óz waqtında orınlamaw jaǵdayları ushıraspaqta. Máhállelerdi abat etiw, puqaralar jıyını imaratlarınıń materiallıq-texnikalıq bazasın bekkemlew, kóshelerdi tártiplestiriw, sonday-aq, mámleketlik baǵdarlamalar sheńberinde topıraq jollardı qum-щeben aralaspalı jollarǵa ótkeriw, kelip túsken múrájatlar boyınsha ishki jollardı ońlaw sıyaqlı bir qatar wazıypalar talap dárejesinde orınlanbaǵan. Prezident qararı tiykarında sociallıq obektlerdiń ısıtıw qazanxanaların kómir janılǵısına ótkeriw, qayta tikleniwshi energiya dáreklerin ornatıw jumısları da belgilengen rejeden artta qalmaqta. Rayonda 2023-jıl dawamında puqaralardan arnawlı portalǵa turaq-jay satıp alıw ushın subsidiyalar ajıratıw boyınsha jámi 264 arza kelip túsken. Sonnan, 41 arzaǵa unamlı xabarnamalar berilip, tek ǵana 2 puqaraǵa subsidiya tólep berilgen, 39 puqaraǵa subsidiyalar ajıratılmaǵan. Sonıń menen birge, mámleketlik uyımlarda artıqsha is haqı tólew, bos jumıs orınların jasırıw sıyaqlı unamsız jaǵdaylar da ushıraspaqta.
Kegeyli rayonında mektepke shekemgi bilimlendiriw shólkemleri ushın byudjetten ajıratılǵan subsidiya pullarınıń maqsetli jumsalıwı úyrenilgende bir qatar qáte-kemshilikler anıqlanǵan. Mámleketlik byudjetten ajıratılǵan qarjılardıń maqsetli jumsalıwında da qatar nızam buzıwshılıq jaǵdayları ushırasqan. Jer uchastkalarınan paydalanıwda mámleketlik qadaǵalawdıń nátiyjeliligin arttırıw boyınsha ilajlar, kóp qabatlı turaq-jaylardaǵı qurılıs-ońlaw jumısları, mámleketlik aktivlerdiń aukcion sawdalarına shıǵarılıwı hámde bos turǵan mámleketlik obektler boyınsha rejeler talap dárejesinde orınlanbay atır. Bunnan tısqarı, mashqalalı kreditlerdi kemeytiw, investiciya qarjıların ózlestiriw, ónimlerdiń eksportın ámelge asırıw boyınsha jumıslar tómen dárejede alıp barılmaqta. Ózbekstan Respublikası Prezidentiniń 2018-jıl 27-iyundaǵı PP-5466-sanlı Pármanı tiykarında rayon aymaǵında 2018-2021 jıllar aralıǵında jámi 70 jasqa 8,2 gektar jer maydanları ajıratılǵan. Bul ajıratılǵan jer orınlarınan kópshiliginiń jer maydanına bolǵan huqıqları búgingi kúnge shekem mámleketlik dizimnen ótkerilmegen. Sonıń menen birgelikte májiliste awıl xojalıǵı tarawında ámelge asırılıp atırǵan jumıslar, suwdı únemlewshi texnologiyalardı en jaydırıw hám suwdıń nátiyjeli bólistiriliwin támiyinlewshi qurılmalardı ońlaw boyınsha wazıypalar, azıq-awqat qáwipsizligin támiyinlew hám sharwashılıqtı rawajlandırıw ilajları boyınsha da sóz etildi.
Májiliste óz wazıypasın orınlawda qate-kemshiliklerge jol qoyǵanı ushın Kegeyli rayonı ekonomika hám qarjı bólimi baslıǵı, Máhállebay islesiw hám isbilermenlikti rawajlandırıw orayı baslıǵı iyelep turǵan lawazımınan bosatıldı. Rayon hákiminiń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı, rayon hákiminiń orınbasarı-Shańaraq hám hayal-qızlar bólimi baslıǵı, medicina birlespesi baslıǵına intizamıy jaza sharası qollanıldı. Májilis juwmaǵında aldaǵı ámelge asırılıwı tiyis wazıypalar belgilep alındı.
Qaraqalpaqstan Respublikası Joqarǵı Keńesiniń Málimleme xızmeti