Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonındaǵı máhálle belsendileri hám kóshe biyleri menen ushırasıw ótkerdi

Onda tiyisli ministrlik, basqarma hám shólkem basshıları, rayonlıq mákeme, kárxana wákilleri qatnastı. Ótkerilgen ushırasıwda Prezidentimizdiń basshılıǵında búgingi kúnde Qaraqalpaqstan Respublikasın hár tárepleme rawajlandırıw, xalıqtıń turmıs abadanlıǵın támiyinlew, infrastruktura menen baylanıslı mashqalalarǵa sheshim tabıw baǵdarında ámelge asırılıp atırǵan jumıslar haqqında atap ótildi. Búgingi kúnge kelip, xalıqtıń jıllar dawamında jıynalıp qalǵan mashqalaları hám táshwishleriniń sheshimin tabıwda barlıq buwındaǵı basshılar tómenge túsip, «Xalıq mámleketlik uyımlarǵa emes, al mámleketlik uyımlar xalqımızǵa xızmet etiwi kerek!» degen princip tiykarında ámeliy jumıslar alıp barılıp atır.

Ámiwdárya rayonında mámleketlik baǵdarlamalar tiykarında 2023-jılda 71 sociallıq hám infrastruktura obektlerinde 69,8 mlrd. sum qarjı tiykarında qurılıs-ońlaw jumısların alıp barıw rejelestirilgen. Atap aytqanda, investiciya baǵdarlaması, máhállelerde birinshi gezekte ámelge asırılıwı rejelestirilgen jumıslar, infrastrukturanı jaqsılaw, járdemge mútáj puqaralardı qollap qwwatlaw, sonday-aq, Ministrler Kabinetiniń rezerv fondı esabınan topıraq jollarǵa ЩPS tósew, rayondaǵı kóp qabatlı turaq jaylarda ońlaw hám abadanlastırıw jumısların alıp barıw sıyaqlı bir qatar wazıypalar belgilep berilgen bolıp, bul baǵdarda ámeliy jumıslar dawam etpekte.

  Bunnan tısqarı, puqaralardıń múrájatları tiykarında turaq jay alıw ushın subsidiya ajıratıw, sociallıq járdemge mútáj puqaralardı qollap-quwatlaw, kadastri joq úylerdiń hújjetlerin rásmiylestirip beriw, qayta tikleniwshi energiya dereklerin ornatıw sıyaqlı da mashqalalar óz sheshimin tappaqta. Rayonda mashqalalardı sheshiw ushın tikkeley Prezidentimiz tárepinen 49 máhállege qosımsha 24,5 mlrd. sum qarjı ajıratılǵan. Joqarǵı Keńes Baslıǵı ámelge asırılıp atırǵan jumıslar menen bir qatarda, ele de sheshimin kútip turǵan mashqalalar bar ekenligin ayrıqsha tilge aldı. Atap aytqanda, xalıqtıń kewil-keypiyatına tuwrıdan-tuwrı tásir etetuǵın bazar infrastrukturası, jol, elektr energiyası hám ishimlik suwı támiynatı, sapalı medicinalıq xızmet kѳrsetiw baǵdarında bir qatar mashqalalar ushıraspaqta. Ásirese, “Mańǵıt diyqan bazarı” boyınsha kóplegen múrájatlar kelip túsip atırǵan bolıp, bul mashqala da Joqarǵı Keńes Baslıǵınıń jeke qadaǵalawına alınǵan hám tez arada unamlı ózgeris ámelge asırılıwı belgilengen Bunnan tısqarı, ushırasıwda rayondaǵı avtomobil hám ishki xojalıq jolların ońlaw boyınsha kóplegen múrájatlar kelip túsip atırǵanlıǵı, usı tiykarda keń kólemli jumıslar ámelge asırılıp, bul ilajlar ele de dawam ettiriliwi atap ótildi.    

Qaraqalpaqstan Respublikası Joqarǵı Keńesiniń Málimleme xızmeti