Ámiwdarya rayonındaǵı “Qılıshbay” máhállesi abat mánzillerdiń birine aylanadı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonı “Qılıshbay” awıl puqaralar jıyını belsendileri, kóshe biyleri hám nuranıy-aqsaqallar menen ushırastı. Aytıp ótiw kerek, búgingi kúnde alıs, eń shetki, itibardan shette qalıp qoyǵan máhállelerdi abat etiw jumısları respublikamız boyınsha keń túrde dawam etpekte. Taxtakópirdegi “Beltaw”, Qaraózektegi “Qaraózek”, Tórtkúldegi “Qumbasqan” awıllarınan baslap, Nókis qalasındaǵı sharayatı awır máhállelerde bunday ilajlar ámelge asırılıp atır. Ótkerilgen ushırasıwda usı ilajlardıń dawamı sıpatında Ámiwdárya rayonındaǵı máhállelerdi keń kólemli abadanlastırıw, puqaralardı qıynap kelgen mashqalalarǵa hár tárepleme sheshim tabıw ilajları “Qılıshbay” máhállesinen baslanatuǵınlıǵı atap ótildi.

Joqarǵı Keńes Baslıǵı onda barlıq máseleler belgilep alınǵanlıǵı, hár bir mashqala basqıshpa-basqısh sheshimin tabatuǵınlıǵın ayrıqsha tilge aldı. Ushırasıwda «Qılıshbay» puqaralar jıyınına alıp barıwshı 4R-181 avtomobil jolınıń ońlawǵa mútájligi, 7 km.den artıq ishki jollar ulıwma ońlanbaǵanlıǵı, elektr támiynatı, eski baǵanalar menen baylanıslı qatar mashqalalar, ishimlik suwı menen támiyinlew, xalıqqa xızmet etiwshi tez járdem avtomashinaların jańalaw, medicinalıq xızmettiń sapasın jaqsılaw zárúrligi bar ekenligi sıyaqlı mashqalalardı saplastırıw ilajları kórilip atırǵanlıǵı aytıp ótildi. Sonday-aq, Aziya rawajlandırıw banki qarjıları esabınan ámelge asırılatuǵın joybar boyınsha “Qılıshbay” suw bólistiriw qurılmasın rekonstrukciyalaw hámde “Qılıshbay”, “Ayaqshı”, “Xızır eli” puqaralar jıyınları aymaǵında jámi 40 km kóshege suw tarmaqların tartıwdı ámelge asırıwdı jedellestiriw boyınsha juwapkerlerge tapsırmalar berildi.

  Máhálle belsendileri hám nuranıylar Prezidentimizdiń tapsırması menen awılǵa qaratılıp atırǵan ayrıqsha itibardan minnetdar ekenligin hám belgilengen rejeler tiykarındaǵı jumıslar ámelge asırılıp, aymaq xalqınıń abadan turmıs keshiriwi ushın álbette, múnásip sharayat jaratılatuǵınlıǵına bekkem isenim bildirdi. Ushırasıw juwmaǵında wazıypalar belgilepalınıp, juwapkerlerge anıq tapsırmalar berildi.

Qaraqalpaqstan Respublikası Joqarǵı Keńesiniń Málimleme xızmeti