Qaraqalpaqstan Respublikası Joqarǵı Keńesiniń Baslıǵı Amanbay Orınbaev mádeniyat hám kórkem óner tarawı xızmetkerleri menen jaqınnan pikirlesti

Onda dáslep Joqarǵı Keńes Baslıǵı shıǵıp sóylep, jańadan tayınlanǵan Mádeniyat ministrin tanıstırdı. Qaraqalpaqstan Respublikası Mádeniyat ministri lawazımına Temirbaev Begisbay Jumabaevich tayınlandı. Temirbaev Begisbay búgingi kúnge shekem "Ayqulash" qaraqalpaq mámleketlik milliy folklor ansambliniń direktorı lawazımında islep kelgen. Bunnan keyin, sońǵı jılları húrmetli Prezidentimiz basshılıǵında barlıq tarawlar qatarında mádeniyat hám kórkem óner xızmetlerin qollap-quwatlaw, tarawdı hár tárepleme rawajlandırıwǵa qaratılıp atırǵan itibar hám kórsetilip atırǵan ǵamxorlıqlar haqqında aytıp ótti.

Atap ótilgenindey, ótken qısqa dáwir ishinde tarawǵa baylanıslı bir qatar párman hám qararlardıń qabıl etilgeni bul baǵdardaǵı ilajlar kólemin jańa basqıshlarǵa kótermekte. Ásirese, Qaraqalpaqstan boyınsha óz aldına qabıl etilgen qararlar milliy mádeniyatımız benen kórkem-ónerimizdi jáne de rawajlandırıwda áhmiyetli orın tutpaqta. Usı jıldıń 10-iyul kúni «Qaraqalpaqstan Respublikası Ministrler Keńesi janında mádeniyattı qollap-quwatlaw fondın shólkemlestiriw haqqında»ǵı qarardıń qabıl etiliwide shın mánisinde Prezidentimizdiń Qaraqalpaqstanǵa, onıń mádeniyatı hám kórkem ónerine bolǵan ayrıqsha itibarınıń jáne bir ayqın kórinisi boldı desek aljaspaǵan bolamız. Aytıp ótiw kerek, sońǵı jılları elimizde tarawdı rawajlandırıw baǵdarında xalıqaralıq tańlawlar ótkeriw hám gastrol saparların shѳlkemlestiriw, bir qatar obektlerde qurılıs hám rekonstrukciya jumısların alıp barıw, shetki aymaqlarda zamanagóy Amfiteatr, mádeniyat orayları, balalar muzıka hám kórkem óner mekteplerin jańadan qurıw, mádeniyat mákemeleriniń materiallıq-texnikalıq bazasın bekkemlew sıyaqlı keń kólemli ilajlar ámelge asırılmaqta.

  Jaqın qısqa dáwir ishinde Ózbekstan mámleketlik Kórkem óner hám mádeniyat instutınıń hámde Konservatoriyanıń Nókis filialları, Opera hám baqsıshılıq mektebi shólkemlestirildi, sonıń menen birge, sońǵı eki jıldıń ishinde bir qatar mádeniyat obektleri jańadan qurıldı. Atap aytqanda Shımbayda 6,2 mlrd. sumlıq 1400 orınlıq, Qońıratta 7,5 mlrd. sumlıq 1200 orınlıq amfiteatr, Qaraózekte 6,7 mlrd. sumlıq mádeniyat orayı qurılıp, paydalanıwǵa tapsırıldı. Ushırasıwda jaratılıp berilip atırǵan usınshama imkaniyatlarǵa qaramay, tarawda sheshimin kútip turǵan bir qatar mashqalalar da jıynalıp qalǵanlıǵı ayrıqsha tilge alındı. Bunnan soń taraw wákilleri, nuranıy-aqsaqallar, veteranlar hám jaslar ózleriniń pikir-usınısların bildirdi. Hár bir kóterilgen másele belgilep alınıp, sheshimin tabıw boyınsha barlıq zárúrli ilajlar kóriletuǵınlıǵı atap ótildi. Ashıq-aydın pikirlesiw túrinde bolıp ótken ushırasıwda tarawdı rawajlandırıw hám bar bolǵan mashqalalardı sheshiw baǵdarında wazıypalar belgilep alındı.

   

Qaraqalpaqstan Respublikası Joqarǵı Keńesiniń Málimleme xızmeti