Joqarǵı Keńes Baslıǵı respublikamızdaǵı mektep direktorları menen ushırastı
1442
Búgingi kúnde elimizde bilimlendiriw tarawında alıp barılıp atırǵan reformalardıń orınlarda ámelge asırılıwın támiyinlew, keleshegimiz bolǵan jaslarımızǵa sapalı bilim beriw, muǵallim hám ustazlardı ulıǵlaw máseleleri mámleketlik siyasattıń baslı baǵdarlarınan sanaladı. Ótken qısqa dáwir ishinde tarawǵa baylanıslı bir qatar nızam, párman hám qararlardıń qabıl etilgeni bul baǵdardaǵı ilajlar kólemin jańa basqıshlarǵa kótermekte.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev bilimlendiriw tarawın rawajlandırıw baǵdarında ámelge asırılıp atırǵan jumıslar hám bul baǵdarda jol qoyılıp atırǵan kemshilikler átirapında pikirlesiw, sonday-aq, orınlardaǵı mektepler basshılarınıń pikir-usınısların tıńlaw maqsetinde respublikamız aymaǵındaǵı mektep direktorları menen ushırastı.
Onda dáslep, Joqarǵı Keńes Baslıǵı húrmetli Prezidentimiz basshılıǵında ámelge asırılıp atırǵan jumıslarǵa keń túrde toqtaldı.
Atap ótilgenindey, sońǵı jılları bilimlendiriw sistemasın jańasha rawajlandırıwǵa, muǵallimlerdiń jámiyettegi abırayın arttırıwǵa, olardı ruwxıy hám materiallıq qollap-quwatlawǵa, jaslardı hár tárepleme bilimli etip tárbiyalawǵa ayrıqsha itibar qaratılmaqta.
Sońǵı bes jıldıń ishinde ulıwma bilim beriw mektepleri sanı 706 dan 722 ge artıp, pitkeriwshilerdiń joqarı oqıw orınlarına kiriw kórsetkishi 14,2 procenten 41,8 procentke jetkerildi. Qábiletli jaslarımızdı oqıtıw sistemasın ele de jetilistiriw maqsetinde aymaǵımızda Prezident bilimlendiriw mákemeleri agentligi sistemasındaǵı 18 qánigelestirilgen mektep hám mektep-internatları shólkemlestirildi.
Húrmetli Prezidentimizdiń arnawlı Pármanı tiykarında 2022/2023-oqıw jılınan baslap respublikamızdaǵı 143 mıń 577 baslanǵısh klass oqıwshıları keytering shólkemleri tárepinen biypul azıq-awqat penen támiyinlew máselesi ilgeri súrildi. Bul maqsetler ushın 2022-jıl 100 mlrd. sum, 2023-jıl 135 mlrd. sum qarjı ajıratıldı.
Sonıń menen birge, sońǵı eki jıldıń ishinde bir qatar bilimlendiriw obektleri jańadan qurıldı. Bıyılǵı jılda mámleketlik baǵdarlamalar sheńberinde respublikamızdaǵı 13 mektepte 120,8 mlrd.sumlıq qurılıs-ońlaw jumısları alıp barılmaqta.
Ótkerilgen ushırasıwda jaratılıp berilip atırǵan usınshama imkaniyatlarǵa qaramay, tarawda sheshimin kútip turǵan bir qatar mashqalalar da bar ekenligi ayrıqsha tilge alındı, ayırım máseleler sın kóz-qarasta talqılandı.
Bunnan soń mektep direktorları ózleriniń pikir-usınısların bildirdi.
Hár bir kóterilgen másele belgilep alınıp, sheshimin tabıw boyınsha barlıq zárúrli ilajlar kóriletuǵınlıǵı atap ótildi.
Ashıq-aydın pikirlesiw túrinde bolıp ótken ushırasıwda tarawdı rawajlandırıw hám bar bolǵan mashqalalardı sheshiw baǵdarında wazıypalar belgilep alındı.
Onda dáslep, Joqarǵı Keńes Baslıǵı húrmetli Prezidentimiz basshılıǵında ámelge asırılıp atırǵan jumıslarǵa keń túrde toqtaldı.
Atap ótilgenindey, sońǵı jılları bilimlendiriw sistemasın jańasha rawajlandırıwǵa, muǵallimlerdiń jámiyettegi abırayın arttırıwǵa, olardı ruwxıy hám materiallıq qollap-quwatlawǵa, jaslardı hár tárepleme bilimli etip tárbiyalawǵa ayrıqsha itibar qaratılmaqta.
Sońǵı bes jıldıń ishinde ulıwma bilim beriw mektepleri sanı 706 dan 722 ge artıp, pitkeriwshilerdiń joqarı oqıw orınlarına kiriw kórsetkishi 14,2 procenten 41,8 procentke jetkerildi. Qábiletli jaslarımızdı oqıtıw sistemasın ele de jetilistiriw maqsetinde aymaǵımızda Prezident bilimlendiriw mákemeleri agentligi sistemasındaǵı 18 qánigelestirilgen mektep hám mektep-internatları shólkemlestirildi.
Qaraqalpaqstan Respublikası Joqarǵı Keńesiniń Málimleme xızmeti